Maxi Cab chuanman ah hma la turin DTO ngen

Kolasib District Consumers' Union (KODCU) chuan Kolasib District Transport Officer (DTO) hnenah kumin March ni 12-a State Transport Authority (STA) Secretary in thuchhuah a siam angin Kolasib District chhunga lirthei a sumdawng ten rate an hman theih nan hma la turin an ngen.

Kolasib District Consumers' Union (KODCU) ten Kolasib DTO hnena tunhnaia ngenna an siam hian Maxi cab (Sumo) chuanman a kawk deuh bik nia a lan thu kan thulakna chuan a tarlang a, STA rate in a tarlan dan chuan Maxi Cab chuanman hi Metalled road-ah mi pakhat tan KM khatah Rs. 3.50/- tur niin, Metalled Road lo ah KM khatah Rs. 4/- tur a ni a. Aizawl leh Kolasib inkar chu KM 83 niin STA rate ang chuan Maxi Cab chuanman hi chu Rs. 290.50/- tur a nih laiin, tuna chuanman chu Rs. 350/- a ni a. Silchar leh Kolasib inkar chu KM 97 niin STA rate angin chuanman Rs. 339.50/- tur niin tuna Maxi Cab chuanman chu Rs. 400/- a ni. Kolasib leh Bairabi inkar pawh KM 34 niin sawrkar rate ang chuan Maxi Cab chuanman Rs. 119/- tur a ni a, tuna an rate chu Rs. 150/- a ni bawk.

Hetianga sawrkar rate siam ang hian Maxi Cab te hi tlana mi harsa zawkte tan inpekna thar nei turin KODCU chuan lirthei neitute an ngen a, an hmalakna erawh a hlawhtling lo nia thudawn a ni a. Maxi Cab neitute chuan STA rate thar chu kum 3 vel kaltaa mi, tunhnaia her lum mai ni a an hriat thu sawiin, Maxi Cab chuanman to chhan chu thilman sang zelah motor part leh tuialhthei man a to zel vang niin an sawi a. An dinhmun hrethiam turin mipuite an ngen ve thung a ni.