Kumin January - March chhungin Mizoram-ah TB vei mi 595 hmuhchhuah an ni tawh

Kumin (2024)-ah January thla atanga March thla tawp thleng khan Mizoram-ah TB vei mi 595 hmuhchhuah an ni tawh a, nikum-a January thla atanga March thla chhunga TB vei hmuhchhuah aiin mi 175 in an tam zawk a ni.

National TB Elimination Programme 1st Quarter 2024 Review Meeting chu nimin khan Aizawl-a DHS Old Building Conference Hall-ah neih a ni a, he hunah hian kumin chhunga TB dona kawnga hmalakna hrang hrang te thlirho niin kumin hian January thla atanga March thla tawp, 1st Quarter chhung khan Mizoram-ah TB vei nia rinhlelh mi 3761 te enfiah atangin TB vei mi 595 hmuhchhuah an ni tawh a, nikum-a January thla atanga March thla tawp thleng khan TB vei mi 420 hmuhchhuah niin nikum aiin kumin hian TB vei hmuhchhuah hi mi 175 in an tam zawk a ni.

Kumin-a 1st Quarter chhung hian Mizoram-ah TB dam har chi, MDR-TB vei mi 38 hmuhchhuah an ni tawh a, Mizoram-a TB vei hmuhchhuah tawh zingah hian TB leh HIV vei kawp mi 57 an awm bawk a. TB vei zinga za zela 5 te chuan an thihpui laiin za zela 77 te chu enkawl dam an ni a, TB vei hmuhchhuah zingah hian 6% te chu Zunthlum nei niin za zela 33 te chu Vaihlo kaihhnawih ti an ni a, za zela 16 chu Zu in mi an ni bawk.

Kumin chhunga Mizoram-a TB vei hmuhchhuah tawh mi 595 zingah hian Aizawl District-a hmuhchhuah tam berin 433 hmuhchhuah an ni a, Kolasib District-ah mi 46 hmuh niin an dawt a, Lunglei District-ah 34 hmuh ni bawkin Lawngtlai District-ah 27, Champhai District-ah 24, Siaha District-ah 16, Serchhip District-ah mi 10 leh Mamit District-ah mi 5 hmuh an ni.

Nimin-a National TB Elimination Programme 1st Quarter 2024 Review Meeting-ah hian TB laka inven dan, ‘TB Preventive Therapy’ chungchang a hraittur pawimawh hrang hrang sawiho a ni a.  An khak-a TB hrik hmuh, Chuap TB vei chenpuite chu TB an vei leh vei loh endik vek a, TB an vei loh chuan TB venna hi an lak a ngaih thu te, Chuap TB Khak-a hrik hmuh te chuan an chenpuite TB an kaidarh mai a awlsam em avangin an chenpuite hian TB venna an lak a pawimawh thu sawiho a ni. Hei bakah hian TB venna hi la duh lo an awm nual thu pawh he hunah hian tarlan a ni bawk a. TB venna la tura intihluih theih ni lo mah se hei hian TB kai lo tura a ven avangin Chuap TB vei chenpuite chuan an lak ngei a pawimawh thu pawh he hunah hian tarlan a ni bawk.