Kumin-ah Dengue vei 110 hmuh ni tawhin Damdawi-a chiah Thosilen semchhuah mek a ni

Mizoram-ah kumin kumtir atanga April thla tawp thleng khan Dengue vei mi 110 zet hmuhchhuah ni leh tawhin thihpui erawh an awm lo a. Hetihlai hian Sikserh (Malaria) laka invenna atana Damdawi hmanga chiah Sa Thosilen sem thin chu kumin hian District hrang hrangah semchhuah leh mek a ni bawk.

Health Department hnuaia, Vector Borne Disease Control Programme, National Health Mission (NHM)-a thawktu ten an sawi danin Mizoram-ah kumin kumtir atanga April thla chungin Dengue vei 110 hmuhchhuah an ni leh tawh a, hemi hun chhung hian Aizawl West leh Aizawl East bakah Lunglei District-ah te Dengue natna hi a hluar bik tih thisen an endikna atangin hmuhchhuah a ni a, Dengue natna avanga thi kumin ah an awm loh thu sawiin, nikum khan he natna thihpui hi mi pahnih an awm a ni.

Dengue natna hi Thosi seh atanga inkaichhawn theih a ni a, a thehdarhtu hi Thosi chi khat Aedes niin Aedes hian vawi khat Dengue hrik a pai tawh chuan a damchhung in a pai reng a, a seh apiang ten Dengue an vei tawh thin a ni. Aedes thosi hian chhun khaw en laiin mi a seh deuh ber thin a, ruahsur zawhah a pung hluai thin bawk. Health Department hotute chuan Dengue vei nia inringhlel an awm a nih chuan a rang thei ang bera damdawi In pan tur leh thisen endik tir nachang hre turin mipuite an chah a ni.

Hetihlai hian Malaria laka mipuite an him theihna turin tunlai hian damdawi hmanga chiah sa Thoseilen chu semchhuah leh mek a ni a, State Vector Borne Disease Control Prog-ramme (SVBDCP) hotute chua India rama Sikserh vei tamna ber State-ah hian Sikserh vei an tlem zel theih nan theihtawp chhuaha hmalak mek a nih thu leh sawrkar laipui atanga a thlawna dawn Thosilen te chu semchhuah mek a nih thu an sawi a. Damdawi-a chiah Thosilen an sem hi mipuiin an hman that chuan Sikserh vei an tlakhniam thin thu sawiin, kum 2016-a Thosilen sem runpui an neih ah a dawngtu ten an zar that avangin Sikserh vei an tlakhniam thu leh kum 2020-a an sem tumah erawh zar tha lo an tam avangin awmzia a nei vak lo tih an sawi bawk.