Vanga leh Vahrit thi chungchangah FIR thehlut

Sava vang tawh tak Vanga leh Vahrit thi tawh thlalak tunhnaia Social Media-ah a darh avangin Forest Department chuan Police te hnenah FIR an thehlut.

Aizawl Wildlife Division-a Deputy Conservator of Forest Margaret Lalramchhani sawi danin Vanga leh Vahrit thi tawh thlalak darh hi ‘Hranghlui’ Facebook Group-ah ‘Lalhruaia Sailo’ tihin a post a ti a, he thlalak darha watermark-ah hian ‘Chhakchhuanga Enga’ tih a chuang a, hei vang hian Mizoram chhung ngei anih rin ani tih sawiin, Thlalak leh Post darh hi Screenshot an hmuh anih avangin thlalak hun leh post hun hriat theih a ni lo thung a ni. Margaret Lalramchhani chuan hemi chungchang ah hian Inrinni khan Aizawl Police Station-ah FIR thehlut tura an kal thu leh amaherawhchu Cyber Crime lamah an lo forward sak avangin Vawiin-ah an kal dawn thu a sawi a, Bethsebi Lalremruati, Range Officer hmingin case ziahluh a nih thu a sawi bawk.

Vanga leh Vahrit hi nungcha humhalh bik, Scheduled-I ve ve an ni a, Conservation Mizoram in ramchhunga Sava zirchianna a kalpui mekah kumin April ni 7 khan Vangá Blyth's Tragopan Tragopan blythii chu Thaltlang khaw ramchhung, Phawngpui National Park nena inri ah thla lak fuh a ni a; hei hi Mizoram-ah Vangá a la awm ngei a ni tih kum 10 hnu a chian leh theihna awmchhun a ni. Vangá te hi International Union for Conservation of Nature (IUCN) leh BirdLife International te chuan mang mai hlauhawm hnai tawh 'Vulnerable Category' ah an dah a ni a. An chenna ram chereu zel vang te, an sa ei atana pèl thin an nih vang te hian an tlem tial tial niin hriat a ni bawk.