Ruihhlo hluar zel do tura tan la turin tlawmngai pawl bakah Kohhran te nen thawhho a ngai - END Minister

Excise and Narcotics Department changtu Minister Lalnghinglova Hmar chuan Mizoram-a ruihhlo hluar zel do tura tan la turin tlawmngai pawl bakah Kohhran te nen thawhho a ngai tih sawiin, Central YMA President Lalhmachhuana pawhin Zu leh ruihhlo hluar zel chu mipuiin ngai-a an neih mai a hlauhawm tih a sawi.

Nimin khan Excise & Narcotics Department changtu Minister Lalnghinglova Hmar hovin a Pisa-ah Central YMA hruaitute leh Excise & Narcotics Department hotute chuan Zu leh ruihhlo dona kawnga hmalak dun dan tur an sawiho a, he sawihona hunah hian Excise & Narcotics Department changtu Minister chuan Mizoram in zu leh ruihhlo vangin a tuar nasa tawh hle tih sawiin, hemi do tur hian Excise & Narcotics Department leh Mizoram-a pawl lian ber, Central YMA chu thawhdun zel a pawimawh thu a sawi a. Chutianga thawhhona ah chuan hmun hrang hrang atanga Zu leh ruihhlo rawn lut tur dan thu ah te, a dapchhuahna chungchangah te thawkho zelin, YMA bakah, sawrkara Department dang te leh Kohhran te thawhpui a ngai dawn tih a sawi bawk a ni.

He hunah hian Excise & Narcotics Department Commissioner Z. Lalhmangaiha chuan tunhnaia Burma ram buai vanga raltlante avangin Phunchawng leh a chhehvela Zu siam a pun belh bakah, Aizawl hmun hrang hranga Hotel leh Restaurant thenkhata ualau taka zu chelek thin an awm nia sawi chu an enzui dawn tih a sawi a. Zu leh ruihhlo dona kawngah chuan Central YMA emaw, Pawl hrang hrang dangte chu Excise Department-in an thawhpui zel tur thu a sawi bawk a ni.

Central YMA President Lalhmachhuana chuan Zu leh ruihhlo hluar zel chu mipuiin ngaia an neih mai a hlauhawm tih sawiin, Zu leh ruihhlo laka fihlimna tur thu leh khuahkhirhna thu chu a tam thei ang ber mipuite hriatah puanzar a ngai tih a sawi bawk. He sawihona hunah hian Zu leh ruihhlo dona kawnga an ngaih pawimawh hrang hrang te huamzau takin an sawiho a ni.

Comments

Popular News (Last 30 Days)

LPG man bithliah thar