MNF sawrkar vangin SASCI sum cheng vbc. 433.36 a lapse niin CM in a sawi

Chief Minister Lalduhoma chuan MNF sawrkar vangin SASCI sum cheng vbc. 433.36 a lapse tih sawiin, an sawrkar hnuah SASCI sum an dawn ve tawh thu a sawi a. “Phel sin a, Party Worker-te sem tihvel kan ti ve lo. Project pawimawh zual pariat kan thlang,” a ti.

Nimin-a CMO Conference Hall, Aizawl-a thuthar thehdarhtute a kawmna ah Chief Minister Lalduhoma chuan a kaihhruai sawrkar chu SASCI Part-I sum cheng vaibelchhe engemaw zat ti lapse anga puhna a awm thu sawiin, “Mimal anga ka mawhphurhna a nih avangin sawifiah ngei ka duh a ni,” a ti a. SASCI sum chu Covid avanga State-te chhawmdawlna atana Central-in a ruahman, loan pung awm lo, kum 50 hnua rulh tur a ni tih sawiin, Part-I bak chu a Lapse theih loh thu a sawi a. SASCI Part-I ah 2nd Instalment hmu turin 1st Instalment-ah 75% hmuh a ngaih thu sawiin, “75% thawh hman a nih loh chuan a Lapse. SASCI sum hi Central Share of Taxes anga insem a ni a, SASCI atana ruahman atangin Mizoram in 0.5% kan chang,” a ti a. Mizoram tan kum 2021-22 ah cheng vbc. 200 leh kum 2021-22 ah cheng vbc. 300 ruahman a nih thu sawiin, “Hemi kum hnihah hi chuan an hmang tha thawkhat. Kum 2022-23 ah kan chan tur vbc. 400 a ni a, kan hmang tha hleithei ta lo. 1st instalment cheng vbc. 200 release a ni a, sawrkarin a hmang tha hlei thei lo,” tiin 2nd instalment cheng vbc. 200 chu a lapse tak thu a sawi a. Kum 2023-24 ah Mizoram chan tur chu cheng vbc. 700 a nih thu pawh sawiin, “Cheng vbc. 466.64 release phawt a ni a, project thar anga thehluh leh a nih avangin cheng vbc. 200 chu kum hmasa lama zawh loh chhunzawmna atan hman a ni. A la bang cheng vbc. 262.55 a la awm,” a ti bawk.

Chief Minister chuan MNF sawrkar chuan cheng vbc. 262.55 chu inthlan Campaign na atan hman a tum tih sawiin, “Constituency Wise-in sum an sem zep loin khatihlaia CM pawhin a sawi a nih kha. An chetlai em em a, an muang sual,” tiin, an chet muan avanga 75% hna thawh hman a nih loh avangin 2nd instalment cheng vbc. 233.36 a lapse tak thu a sawi a. MNF sawrkar chetmuan vanga thil thleng chu anmahni an puh daih thu sawiin, “A mawhphurtu kan zawn dawn chuan sawrkar hmasa an ni. Kum 2022-23 a an tih lapse nen a vaiin cheng vbc. 433.36 an ti lapse,” a ti.

Lalduhoma chuan an sawrkar hnuah SASCI sum an dawn ve tawh thu pawh sawiin, kum hmasa lama kan dawn zat kan dawng dawn emaw an tih laiin Central-in SASCI atana sum a dah cheng vbc. 80,000 atangin cheng vbc. 55,000-ah a tihniam thu leh kum 2024-2025 a Mizoram chan tur chu cheng vbc. 275 a nih thu a sawi a. SASCI sum chu rang takin an bawhzui thu sawiin, “Phel sin a, Party Worker-te sem tihvel kan ti ve lo. Project pawimawh zual pariat kan thlang a, kan thehlut tawh. March 15, 2024 khan approval kan dawng. Model Code of Conduct zawh velah kan bawhzui ang. 75% kan zawh velah kan dil leh ang a, kan thawh that na na chuan min pek belh kan beisei,” a ti a. Project an thehluh zingah District 7-a Jail sak that tura ruahmanna te, Aizawl leh Lunglei a tuilakna tihchakna turte, District 11-a Zirtirtu Quarters dah te leh Industrial Training Institute (ITI) tihchangtlun te, Tuirial Hydel Project thawmthat bakah sawrkar Quarters indaih-lohna tih tlem nan Type 5 leh Type 6 sak belh na tur Project te chu a tel thu Chief Minister chuan a sawi a ni.

An sawrkar hnuah Official-te nen inren-chemna theihtawpa an kalpui bakah sum hnarte an dap thu pawh Chief Minister chuan sawiin, “Sum dinhmun chhe tak atangin GST-ah India ramah pakhatna kan ni. Sawrkar hnathawk hlawh a hunah ka pe thei zel rih. Official-te thawhrimna zar a ni. Hmabak erawh a la ko,” tiin, sawrkar kumtharah chuan sum dinhmun a ziaawm ve deuh tawh an beisei thu a sawi bawk.

Comments

Popular News (Last 30 Days)

LPG man bithliah thar