Serchhip District-ah kum 3 kalta chhungin puipunna hmuna meizu man an pung chho zel
Serchhip District Anti-Tobacco Squad Meeting Cum Training tunhnaia neih a tarlan a nih danin kum thum kalta, kum 2021-2022; 2022-2023 leh 2023-2024 chhung khan Serchhip District Anti Tobacco Squad te hian Serchhip District-ah puipunna hmuna mei zuk khapna dan bawhchhia mi 182 an man a, kum 2021-2022 khan mi 32 manin kum 2022-2023 khan mi 58 man leh an ni a, sawrkar kum liamta 2023-2024 chhung khan mi 92 manin kum 2021-2023 chhunga an man belhkhawm mi 90 aiin kum kalta a puipunna hmuna meizu an man hi mi pahnih in an tam zawk a ni. He huna tarlan a nih danin kum kalta 2023-2024 chhung khan Serchhip District Anti-Tobaco Squad te hian Squad Drive tum 29 neiin puipunna hmuna meizu mi 92 an man te pawisa chawi tlingkhawm hi Rs. 5580/- a ni a, thawktu dangte nen Joint Operation tum khat an nei bawk a ni.
Serchhip District Anti-Tobaco Squad te hian kum thum kalta chhung khan Shikhaar pawh pouch 3936 zet an man a, nikum chhunga an man erawh tlahniam thungin pouch 39 chauh an man a, Shikhaar-a pawlh chi SS-1 chu pouch 61 an man bawk a ni.
Serchhip District Anti-Tobacco Squad Meeting Cum Training neih hi Serchhip District Anti-Tobacco Squad-a Chairman leh District Bawrhsap David Lalthantluanga chuan hmanpuiin Zuk leh hmuam dona kawnga thawktu, National Tobacco Control Programme-a thawktute chu mi tlemte ni mah se an hmalakna enin hna an thawk tha hle tih a sawi a. Squad Member te chu an thlawp tlat tih pawh sawiin, theihtawp chhuah zel turin a chah a ni. Bawrhsap chuan meizuk sim chu thil harsa tak nia lang ni mah se amah ngei pawh meizu nasa tak a nih thin thu leh kum 2010 atanga a lo sim tawh thu a sawi bawk a ni.
Comments
Post a Comment