Dan anga phalna hmuh loh chuan hna thawk rihlo turin ti

Supreme Court chuan Mizoram sawrkar leh National Highways & Infrastructure Development Corporation Limited (NHIDCL) hnenah Riverine Reserved Forest leh Road Side Reserved Forest of Mizoram huamchinah dan ang thlapa Forest Department atanga phalna an hmu a nih loh chuan hemi huamchhungah hmasawnna hna thawk rih lo turin a hriattir.

Mizorama kawngpui laih leh a kaihhnawihah Forest Dan bawhchhiatna nasa tak a awm nia hriain, Environmental Activist panga – Vanramchhuangi, Chaltlang Dawrkawn; VL. Hrima, Mission Veng; Romalsawma, Mission Vengthlang; Dr. Lalbiaknawia Ngente, Bungkawn leh Rongura Hrahsel, Mission Vengthlang te chu Supreme Court-ah an zualko a, hemi chungchang hi Supreme Court Bench – Justice BR. Gavai leh Justice Sandeep Metha thutna chuan ngaihtuahin, kum 2021-a Gauhati High Court-in Riverine Reserved Forest leh Road Side Reserved Forest of Mizoram chungchanga thutlukna a siam Mizoram sawrkarin a bawhzui dan mak an tih thu an sawi a ni.

Supreme Court-a zualkote aiawha ding Advocate Gaurav Kumar Bansal chuan, Forest Department dan tlawhchhan mumal awm lovin Mizoram Environment Forest & Climate Change Department chuan RRF leh RSRF huamchhunga hmasawnna hnathawh hi a lo phalsak ringawt tih a sawi a. Hei hian Forest Conservation Act 1980 a kalh a ni mai loa, EF&CC PCCF leh Principal Secretary hova thukhawmin RRF huamchin chu Forest ni zel tura thutlukna a lo siam tawh chu a kalh tih a sawi a. Hemi chungchang hi kumin July 24-a ngaihtuah leh turin Supreme Court chuan a ti a. Hemi kaihhnawiha sawi duh an neihte chu sawi hman ngei turin Mizoram sawrkar leh NHIDCL chu a hriattir a ni.