Old Age Pension tihpun ah MUP in lawmthu sawi

Mizoram Upa Pawl (MUP) chuan Mizoram Sawrkarin Old Age Pension atana State Sawrkarin sum a tum ve thin tihpun a ni chu lawmawm an tih thu an sawi.

MUP hian nimin khan Aizawl-a Vanpa Hall-ah General Assembly Vawi 49-na hmangin District Headquarters hruaitute, Area leh Branch hrang hrang hruaitu ten ro an rel a, Mizoram Sawrkarin Old Age Pension atana State Sawrkarin thlatin Rs. 100/- a lo tum ve thin chu kumin Financial Year atanga Rs. 1000/- a tihpun mek anih chungchang ah lawmthu sawiin, Old Age Pension bik hmu tur leh thlakna tur buatsaih chungchangah MUP Branch te chu sawrkarin ngai pawimawh lehzual se an ti a. Mizoram-ah tlawmngaihna tlahniam ven nan MUP ten hma la se, tun aia chak zawkin Nungcha humhalh kawngah Sawrkarin hma la se tih bakah Local Council/Village Council term hi kum 5 ni lovin kum 3 ni turin Sawrkarah thlen ni rawh se an ti a. Zemabawk-a MUP ramah cheng nuai 290 man MUP building sak anih dawn avangin lawmthu an sawi bawk a. Kum 2024-25 Budget cheng nuai 83 chu an pawm bawk.

Nimin-a Mizoram Upa Pawl General Assembly Vawi 49-na hi Social Welfare Department Director Lalhriatzuali Ralte IAS chuan hmanpuiin sawrkarin kum upate tana Scheme hrang hrang a neihte bawhzui mek anih thu te, MUP ten Recreation Centre an neih theihna tur te leh Upate hamthatna tur an buaipui mek a nih thu sawiin, MUP member te duhsakna sang ber a hlan bawk. MUP hi kum 1957-a din niin District Hqrs. 8 leh Branch 586 neiin member 64,100 an awm mek a ni.