PHE Tui pump-na siamtha

Niminpiah tlai leh thli leh ruah thawk avang khan PHE Department ten Serchhip khawpui chawmna atana Tuikum lui atanga Tui an pump na Electric line chu a chhiat bakah IOC Veng Booster Pump atanga Serchhip Bazar lam area-a tui an pekna line pawh leimin avangin a chhe bawk a. PHE Department-a thawktute chuan nizan hmasa atang siamthat tuma hma la nghalin Electric line hi nimin tlai khan siam that a ni a, Pipe Line chhia pawh hi nizan zantir lam khan siamthat niin Booster Pump atang hian hlawhtling taka pump chhuah leh theih a ni.

PHE Serchhip Division-a SDO, Er. Samuel LR. Ralte chuan darkar 24 chhung vel tui an pump theih loh avang hian Veng thenkhat ah Tui sem a khaihlak tih LENKAWL hrilhin, tuna an siamthat avang hian a pangngaia sem zui leh nghal vek theih a ni dawn lo tih a sawi a. Mipui ten an dawn hun pangngaia an dawn leh theihna turin ni 3/4 vel an mamawh dawn thu a sawi a ni.

Tunhnai ruahsur avang hian Tuikum lui ah tui a nu hle tih pawh PHE SDO chuan sawiin, theihtawp an chhuah mek thu leh Tui fim an la pump theih thu a sawi a. IOC Booster Pump-a Diesel khawl pawh tunah hian a chhiat thu leh phai lamah a parts an ngaihtuah mek thu a sawi bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar