DSWRO Aizawl in Serchhip a Sipai bang a rawn tlawh

District Sainik Welfare & Resettlement Officer, Aizawl leh a thawhpuite chuan nimin khan Serchhip rawn tlawhin Serchhip District-a Sipai bang, Ex-Servicemen te nen an inkawm bawk.
District Sainik Welfare & Resettlement Officer, Aizawl Maj. John VL. Khawlhring (Retd) leh a thawhpuite hi Serchhip-a Ex-Servicemen League Sub-Hqrs. te chuan an President Hony Capt. R Lalhmingthanga te In-ah lo dawngsawng in mimal leh pawl anga an harsatna hrang hrang te an lo thlen a, Sipai pension System thar, System for Penson Administration (RAKSHA) chungchangah inzirtirna leh inhrilhfiahna hun an hman nghal bakah an hriatfiah loh hrang hrangte an lo zawtfiah nghal bawk a ni.

Maj. John VL Khawlhring (Retd) hi a nupui Sylvie Z Ralte, Addl. District and Session Judge, Aizawl chuan rawn tawiawmin Sipai bang te zinga dan leh hrai lam harsatna nei ten an harsatna te an lo thlen chu a theih ang anga lo buaipui a intiam bawk a ni.

Serchhip-ah hian kum 1972 atang khan Ex-Servicemen League hi an lo ding tan tawh a, tun dinhmunah Serchhip District pumah hian Member mi 150 vel awm mekin nimin-a hun an hman ah hian Sipai bang thahnem tak an tel a ni.