Sawrkar hmalakna puangzar

Mizo nula thenkhat rampawn a hnathawk tura kal ten buaina an tawh chungchang ah sawrkar chuan nikum atanga hma an lak tawh thu leh ramdanga hnathawk tur tirchhuak thin Private Placement Agency 29-te man an nih tawh thu Home Commissioner H. Lalengmawia chuan a sawi.

Home Commissioner H. Lalengmawia chuan ram danga hnathawka chhuak turte chu anmahni tirchhuaktu Agency-te leh an hnathawh dan tur zirchiang hmasa turin a chah a. Home Department hotute hnen atanga Doordarshan in thu a dawn danin, ramdanga Mizo thalai hnathawka kalte harsatna tawh chungchang chu nikum August thla atang khan chak taka bawhzui a ni a, thu zawhfiah tur te pawh Police Station-ah koh niin an Statement te pawh chhinchhiah a nih bakah man tur te pawh man an ni a, hetihlai hian bail theih an nih avangin bail-in an chhuah bakah nikum-a thubuai lut chu chhui zawh an nih tawh thu leh dan anga hmalak zel a nih tur thu an sawi bawk a ni.

Thudawn bawhzuina atanga a lan danin tunhnaia Private Placement Agency thenkhat te chuan Adhaar Card lem siam avang te, kum 18 hnuailam tirhchhuah avang te leh ram pawna hnathawk tura thawnchhuak tura Valid Certificate an neih loh avanga man te an ni tih Home Department hotute hian an sawi bawk a. Home Department hotute chuan Private Placement Agency te chu dan pangngai angin, Emigration Act hnuaiah license nei tura hma la turin thurawn pawh an pek tawh thu sawiin, dan anga an tih theih chuan Mizoram tan pawh hmasawnna tur nia an ngaih thu an sawi tel bawk.

Home Deparrtment hotute chuan Mizo-ram sawrkar in State danga hnathawk tura inthawn theihna dan a neih chuan Housemaid chauh a huam avangin Dan thar, huam zau zawk siam tura ngawrh taka beih mek a nih thu a sawi bawk.