Lirthei ziahluh thar sing thum chuang a awm

Sawrkar kum liamta 2023-2024 chhung khan Mizoram-ah lirthei ziahluh thar sing thum chuang awmin Transport Department chuan Chhiah an hmuh tura bituk chu cheng vbc. 2 chuanga khumin Chhiah hi cheng vbc. 52 chuang an hmu a ni.

Transport Department chhinchhiahna atanga a lan danin sawrkar kum liamta chhung khan Mizoram pumah lirthei ziahluh thar 30,266 awmin heng zinga a tam zawk chu lirthei ke pahnih nei niin Two Wheeler ziahluh thar hi 21,204 zet a awm a, hei hi lirthei ziahluh zawng zawng atanga chhutin za zela 70 a tling phak a, kumtin hian lirthei ziahluh thar zingah Two Wheeler hi a tam ber ziah a. Kum dang ang bawkin lirthei ziahluh zinga a tam ber dawttu chu Car ni lehin Car ziahluh thar 5056 a ni a, hei hi lirthei ziahluh thar atanga chhutin za zela 16.70 a tling bawk a ni.

Transport Department hotute chuan sawrkar kum liamta 2023-2024 chhunga Chhiah an chhunluh tura sawrkarin a bituk sak chu cheng vbc. 50 a ni tih sawiin, Chhiah an hmuh tak chu Rs. 52,38,52,792/- niin an target hi Rs. 2,38,52,790/- in an khum tih an sawi a. Department in an chhinchhiahna atanga a lan danin a kum telin Chhiah an hmuh hi a pung chho zel a, Financial Year 2022-2023 chhung khan Chhiah atangin Rs. 49,03,46,058/- an hmu a, hemi kum aia kum 2023-2024-a chhiah an hmuh a punna chu Rs. 3,35,06,734/- a tling a ni. Danin a phut angin lirthei neitu te’n Chhiah an pe ngei tur a nih laiin Chhiah pe lo hi thahnem tak an awm thin a, Transport Department hotute’n an sawi danin, kum 2023-2024 chhung khan Chhiah pe lo, document thi lirthei 8540 a awm a ni.