CM thusawi MPYCC in mak an tih thu an sawi

Mizoram Pradesh Youth Congress Committee (MPYCC) chuan Chief Minister Lalduhoma hnena lehkha an thehluh tuma Mizoram Private Placement Agencies (Regulation) Act, 2015 a felhlel a, a bilh a tho lo ti a a lo sawi chu mak an tih thu leh Private Agency thenkhat hum tumna nia an hriat thu an sawi.

Inrinni-a Aizawl Press Club-a thuthar thehdarhtute an kawmnaah MPYCC hruaitute chuan, he dan dikhlel anga a sawi chu a dik lo nia sawiin, “Mizoram pawnah Placement Agency te hian placement an tih theih ngei a ngai zawk a, Mizoram pawna Placement an tih theih nan ‘Beyond the boundaries of Mizoram’ tiin Mizoram sawrkarin dan a lo siam zawk a ni. Chutihlai chuan India ram pawn, Foreign a hnathawktu tur thawnchhuak a, placement tih chungchang erawh chu India sawrkar laipui thu a ni a, Indian Constitution a Seventh Schedule hnuaia Union list ami a ni. Mizoram sawrkarin thuneihna a nei lova dan pawh a siam thei lo,” an ti.

Mizoram Private Placement Agencies (Regulation) Act, 2015 in a tarlanah chuan hmeichhia, kum 18 tling lo hnathawka thawnchhuah khap tlat a ni tih pawh sawiin, “Hmeichhe naupang kum 18 pawh tlinglo Dubai a thawntute hian he dan hi an bawhchhe ngei a ni,” an ti a. Hei bakah hian midang passport hmanga an kaltir lehzel chu dan bawhchhiatna serious tak a nih thu leh Human Trafficking a nih bawk thu an sawi.

MPYCC hruaitute chuan Hmeichhe naupang pahnih, Dubai Jail a thla 7 an tantir te tirtu Agency chuan Dan an bawhchhe ngei tih pawh sawiin, hremna pek theih an nih thu an sawi a. Hetiang a nih laia Chief Minister in tanpui ngaite ngaituah lova, dan bawhchhiaa Dubai a thawntute tan zawk anga lang leh an thlavang rem leh rem lova a hauhsak mai chu a dik lo tih an sawi a. “He Agency neitu, CM te awmna Veng Chawlhhmun mi, dan bawhchhe tute nen hian inzawmna thuk tak an lo nei em ni?” tiin an zawt bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar