Ramri khar tur nia sawi kenkawh a ni lo

May ni 1, 2024 atanga Mizoram leh Myanmar inkar ramri khar tur ni awma Assam Rifles hotute’n an sawi ni a thuthang chu a taka kenkawh a ni ta lova, ramri a intlawhpawh hi a ngai anga kalpui zui zel a ni. Home Department hotute chuan tunhnai khan Assam Rifles leh Subsidiary Intelligence Bureau (SIB) thuneitute kovin hemi chungchang hi an sawipui a. A tira Champhai District VC leh YMA hruaitute bakah Myanmar ramri depa awm khaw engemawzat khawtlang hruaitute hnena May ni 1-a ramri khar a nih tur thu an lo hrilh tawh chu a taka kaltlangpui turin Ministry of Home Affairs atangin thupek an hmu lo ni a hriat a ni a. Chutiang thupek chu phawrh tur an nei bawk lo niin Home Department hotute chuan an sawi.

Home Department hotute chuan Mizoram chu India hmarchhak State zinga hel pawl nei lo leh muanawm ber a nih avangin sawrkar leh District thuneitute hriatpui lohva mipui tiralkhel zawnga khawtlang hruaitute kokhawm tawh lo turin an hriattir bawk a ni.

Hetihlai hian Ministry of Home Affairs chuan ramri a inkalpawh phalna ‘Free Movement Regime’ an tih mai hi tihtawp (suspend) a nih tawh thu an puang niin chanchinbu thenkhat chuan an ziak a. Mahse, Mizoram leh Nagaland-ah chuan tun thlengin a taka kalpui a la ni lo a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man