Serchhip District-ah ASF hmuh la ni lovin mipuite chu fimkhur tura chah an ni

Serchhip-a AH&Vety Department hotute chuan tun dinhmunah Serchhip District-ah African Swine Fever (ASF) hri kai hmuhchhuah a la awm lo tih sawiin, Vawk vulhtute leh a sa zuartute chu fimkhur se an duh thu an sawi.
Tunhnaia Mizoram District thenkhat a Vawk hri, ASF leng chungchang ah LENKAWL zawhna chhangin Serchhip DVO Dr. H. Vanlalrawna chuan Serchhip District-ah ASF hri kai hmuhchhuah ala awm lo tih sawiin, niminpiah khan Serchhip P&E Veng-ah Vawk thi report a awm avangin hei hi a Sample lak niin Vawiin hian Aizawl lama enfiah tura an thawn dawn thu a sawi a, karleh lamah chuan a result an hriat theih a beisei thu leh tun dinhmun ah chuan ASF hri kai finfiah an la neih loh thu a sawi a ni. ASF laka Serchhip District-a Vawk a him theihna turin Serchhip District Magistrate chuan District dang leh State pawn atanga Vawk leh Vawksa bakah Vawksa atanga siamchhuah lakluh chungchang ah khapna thupek a tihchhuah tawh thu sawiin, hei hi mipui ten zawm tha se an duh thu a sawi bawk.

Serchhip DVO chuan District dang atanga Vawk lakluh a nih lohna turin khaw hrang hrang ah a endikna kalpui a nih thu pawh sawiin, amaherawh chu an Department-a thawktute chu mi tlemte an nih avangin mipuite pawhin theihtawp chhuahpui se an duh thu a sawi a. A bik takin Vawk talh thin te chu District dang atanga a ruka Vawk lakluh tum lo tura chahin, hei hi hri rawn luh theihna remchang a nih avangin mipuite pawhin hetiang hi an awm em tih ngaihven tlan a tul thu a sawi bawk a ni.

ASF hri leng palh thei dinhmun ah kan din avangin midang te nena Ran In intlawhpawh loh a pawimawh thu pawh Serchhip DVO chuan sawiin, mihring thawmhnaw leh thildang atanga he hri hi inkaichhawn theih a nih avangin Vawkchaw pek dawnah pawh fimkhur a tul thu te a sawi a. Tui al hmanga ran In silfai thin te pawh a pawimawh thu leh Vawk chaw pek dawnah chhuan so that a pawimawh thu a sawi a. Ran damlo hria te chuan mithiam te hriattir vat thin tur leh a hranga dah vat chu a pawimawh thu a sawi bawk a ni.

Serchhip District-ah Vawk 10,667 vel awm mek anga chhinchhia a nih thu DVO chuan sawi bawkin, he hri leng mek avang hian mipuite chu chi-ai lo turin a chah a, amaherawh chu hri laka kan Vawk vulh te a him theihna tura theihtawp chhuaha kan fimkhur tlan a tul thu pawh a sawi bawk a ni.