DDT aiah Deltamethrin hman a ni tawh dawn

Malaria laka invenna atana Dichloro-Diphenyl-Trichloroethane (DDT) hman thin chu kumin June thla atangin a aia him leh tha zawk nia sawi, Deltamethrin-a thlak a ni dawn.

Health Department hnuaia Vector Borne Disease Control Programme, National Health Mission-a thawktute sawi danin kumin 2024 atangin World Health Organisation (WHO) chuan DDT hman hi a khap a. Hei vang hian a aia tha zawk leh him tura ngaih Deltamethrin a thlak a nih tur thu leh Malaria hluarna hmun bikah kah hmasak a nih tur thu an sawi a ni.

Tunlai hian Mizoram hmun hrang hrang ah Malaria a hluar hle a, Malaria laka invenna atan damdawi hmanga chiah sa Thosilen, Long Lasting Insecticidal Nets (LLIN), Global Fund ten National Vector Borne Diseases Control Prog-ramme (NVBDCP) kaltlanga Mizoram tana an pek 4,14,197 chu sem mek a ni. Addl Director (Malaria) cum State Vector Programme Officer (VBD) Dr. Chawngthanchhunga chuan LLIN thosilen sem mek chu kum 2016 atang khan sem a lo ni tawh tih sawiin, a dawngtu ten an hman that chuan Mizoram-ah Malaria vei nasa takin a tlakhniam phah thin thu a sawi bawk.