BKHP dinchampha lawm

Nimin May 2, 2024 kha Mizoram Baptist Kohhran Hmeichhe Pawl (MBKHP) Day vawi 86-na a ni a, Mizoram chhunga MBKHP Unit hrang hrangte chuan ‘Tho la, I Pathian ko rawh’ tih thupui hmangin he ni hi an hmang a ni.
MBKHP Day hi Kohhran hrang hrangah an hman dan a inang lo a, Kohhran thenkhat chuan he ni puala Inkhawm te neiin ruai nena hun hmang te an awm a, Unit thenkhat chuan khawlai thenfai hnatlang te an nei a. Serchhip Unit te chuan Serchip Bazar leh BC< Serchhip inkar kawngpui dung thenfai hna thawkin hnatlang an nei a ni.

MBKHP hi BCM chhunga Fellowship din hmasak ber niin, kum 1938 khan BMS Missionary Pi Zirtiri (EM Chapman) hovin Girls Auxiliary (GA) tih hming puin din a ni a, amaherawh chu he pawl hian nula chauh a huam avangin kum 1947 khan ‘Nu Pawl’ din ve leh a ni a, heng pawl pahnih hi pawl pakhat-ah dahin Baptist Kohhran Hmeichhe Pawl (BKHP) tih a ni a, Assembly hriatpuiin March 20, 1965-ah a lo ding ta a ni. He pawl hian Baptist Kohhran Hmeichhia zawng zawng kum 14 chunglam a duh apiang chu a huap vek a. Girls Auxiliary (GA) ti-a an din tan ni hi BKHP Day atan pawmin kum 1990 atang khan May 2-ah an hmang ta thin a ni.