Mizoram-ah Thli leh rial avangin In chhia awm belh zel

April thla tir lam atanga ruahsur leh a kaihhnawiha thli leh rial thawk avangin Mizoram-ah chenna In chhia 1400 chuang a awm tawh a, luahzui tlak loh khawpa chhia In tam tak a awm tawh bawk a ni.

Rial tla, thlipui leh ruahsur-in a tihchhiat hi kar kalta Ningani hma zawng kha chuan Mizoram hmarlam chan District pali-ah a ni ber a, Ningani khan Chhim lamah chhiatna thleng a tam ve leh thung a. Ningani (May ni 2) khan rial tla, thlipui tleh leh ruah surin Mizoram District 10-ah chhiatna nasa tak thlenin In 368 ai a tlem lo a tichhia niin Disaster Management and Rehabilitation Department hotute chuan an sawi a. Khawzawl District-ah In 128 a tichhia a. Khawzawl District-ah hian Sialhawk khua-ah In 68 rialin a deng chhia a, heng zinga In 5-te chu luahzui tlak loh a ni a. Tlangpui khua-ah pawh In 55 rialin a deng chhia a ni. Sialhawk khua hi Lakhuihthei leh Serthlum thar tam khua niin an thlai te pawh a chhe nasa hle tih khawtlang hruaitute chuan an sawi a ni.

Lawngtlai District-ah pawh In chhia 209 zet awmin Tuithumhnar khua-ah In 78 a chhia a, Lunghauka-ah In 8 leh Sabualtlang-ah In pakhat a chhia a, Vathuampui-ah Bangladesh Raltlante chenna In 21 a chhe bawk

a. Lawngtlai District chhunga Hmawngbu leh Tuithumhnar khuaa chenna In chhia awm bawkin Inrinni khan Lawngtlai District Bawrhsap Cheemala Siva Gopal Reddy chuan a hmunah tlawhin a enfiah a,  Rialin an In chung rangva a denchhiatte hnenah an lo hman lailawk turin Silpauline a pe bawk.

Siaha District-ah In 69 a chhe bawk a, Aizawl District-ah pawh In 40 a chhia a. Mamit District-ah In 29 a chhia a ni. Saitual District-a Ningani chawhnu lama thli, ruah leh rial rawn thawk avang khan N. Khawlek khua ah In 90 zet chhiain heng zinga 5 te chu luahzui tlak loh khawpin a chhia a, Rial tla hi artui ai pawh a lian  zawk a ni tlangpui hlawm a, Inchung zatve vel thlak ngai In 40 bawr vel an awm a. In chhe nasa lutuk lo, thlak neuh neuh ngai tur chi 50 vel an awm bawk a ni.

Lunglei District-ah chhiatna nasa lutuk thleng lo mah se District thuneitu te chuan chhiatna tenau 15 chu a thleng tih thu an dawng a. DM&R lamin Zonal Officer a ruatte chuan an bial chhung theuhah hma la nghalin silpouline-a khuh ngaite chu silpouline an pe nghal zel a, heng te hi lungrem chim leh In chung chhia te a ni hlawm a. Report hi lakkhawm mek zel a ni a; Zobawk, Lungsen, Bolia, Lungchem, Mamte leh Thingfal khuaah te chhiatna tenau hi thleng a ni.

Thla hmasa April atanga ruahsur, thli tleh leh rial tla avang hian State chhunga hmun hrang hrangah in 1400 chuang a chhe tawh nia hriat a ni a, heng bakah hian kawlphetha pekna hmun hrang hrangah chhia awmin kawng chhia a awm nual bawk a ni.