LADC-ah Congress leh MNF MDC ten sawrkar an siam theih thu Governor hnenah an thlen

Lai Autonomous District Council (LADC)-ah thla thum (3) dawn sawrkar mumal a din loh hnuah Congress MDC pakhat leh MNF MDC 12 ten an din, United Legislature Party (ULP) chuan sawrkar an din theih thu Larsap hnenah an thlen.

LADC-a MDC 13 te hian LADC enkawltu tura Larsap-in a ruat lailawk Lawngtlai Bawrhsap kaltlangin nimin khan Governor hnenah Sawrkarna an siam theih thu hi an thlen a. United Legialature Party (ULP) te hi Lawngtlai West MLA C. Ngunlianchunga leh State Sawrkar hmasa a Deputy Speaker H. Biakzaua ten tawiawmin, LADC-ah Sawrkar a piang mai theilo chu ram mipuiten an tawrh nasat vangin MNF leh Congress chuan mipui tawrhna thleng zel tur ngaingam lovin Sawrkar siamdun an remti tih an sawi a. LADC-a Sawrkarna an siam theih thu Governor hnena thlenna ah hian MDC 13 ten hming an ziah bakah Lawngtlai District Bawrhsap an hmuhna ah hian an vaiin an tel bawk a ni. Congress party leh MNF Party atanga MDC ten an din United Legislature Party-ah hian C. Lalmuanthanga (INC) chu Leader atan thlan a ni a, Deputy Leader-ah Sanghuliana Mualchin leh Secretary-ah H. Lalmuansanga bakah Treasurer-ah Lalropuia Chinzah chu thlan a ni bawk.

Lai Autonomous District-ah hian MNF Legislature Party in an din V. Zirsanga kaihhruai sawrkar ding thin a, amaherawh chu he sawrkar hian thlawptu a ngah tawkloh avangin March 7 khan CEM V. Zirsanga chuan banna a thehlut a ni.

LADC-ah hian Elected Member (MDC) 25 awmin, Chandmary bialtu MDC, Dr. Lorrain Lalpekliana Chinzah chu Assembly inthlanpui-ah Lawngtlai East bial atangin ZPM Ticket in MLA atan thlantlin a nih avangin a bial hi a chhuahsan a, hei vang hian tun dinhmun ah Elected Member 24 awm mekin, kumin April 8 khan MNF MDC 7 ten MNF Party an chhuahsan a, heng MDC 7 te leh BJP leh ZPM atanga MDC pakhat ve ve leh Independent Member 2, an vaiin Member 11 chu Lairam Democratic Alliance lam ah awmin, United Legislature Party (ULP)-ah hian Member 13 an nei mek thung a ni.