Myanmar atangin Mizoram-ah raltlan rawn lut leh

Tunhnai-ah khan Myanmar ram Chin State-a Paletwa Bial atangin raltlan 40 chuang chu Lawngtlai District-a Hruitezawl khua-ah an lo luh belh ni a thudawn a ni.

Intelligence lam sawi danin Myanmar a Rakhine State leh Chin State a awm Hel pawl lian ber Arakan Army chuan Paletwa khawpui (township) ah sipai atan thalaite tihluihna a zawm turin an ti a. Tahan Post-in a ziah danin April ni 30 khan AA-a tel duh lo hmeichhiate telin mi 40 chuang an rawn thleng a, a tuk May ni 1 khan hmeichhe 7 an thlen belh leh a, kum 30 mi deuh vek an ni a, AA-ten sipai training tur an tih vanga rawn tlanchhia te an ni, tiin raltlan tanpuitu zinga thuneitu pakhat chuan a sawi a. Mizoram sawrkar thuneitu lam chuan raltlan lo luh belh thu hi an la hriat loh thu an sawi ve thung.

Sawrkarin a chhinchhiah dan chuan kar kalta Thawhtanni (April ni 29) thleng khan Mizoram-ah Myanmar raltlan 34,282 an awm a, an zinga mi 15,938 te chu Relief Camp hrang hrang 147-ah an awm mek a, mi 18,344 te erawh chuan an chhungte leh thiante an belh bakah engemaw zat chu mi In luaha khawsa te, an hnathawhna hmuna awm chilhte an ni a. Tun dinhmunah raltlante hi mi 10,899 chu hmeichhia an ni a, mipa 10,073 leh naupang 13,310 an awm bawk. Khawzawl, Kolasib, Saitual leh Serchhip District-ah te Relief Camp sak a ni lova, District dang 7-ah chuan relief camp a awm vek a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar