Thli leh Rial thawk avanga Serchhip District-a tuartute hnenah chhawmdawlna leh tanpuina hlan

Niminpiah tlai-a thli leh rial thawk avang khan hriat theih chinah Serchhip District chhunga khaw pali-a chhiatna a thleng a, heng chhiatna thlenna hmun tam ber hi District thuneitute chuan nimin khan a hmunah an tlawh nghal a ni.
Niminpiah tlai thim hma deuha thli leh rial thawk vak kha Serchhip District-ah chuan Thenzawl khua in tuar nasa berin Thenzawl Vengthar-a Lalawmpuii, Zohmangaihi, Neinunga leh Lalhmingmawii te In chu luahzui tlak loh khawpin a chhia a, heng bakah hian chenna In dang paruk te chu In chhung chhia leh siamthat ngai (partially damaged) niin Thenzawl Venghlun-ah chenna In pariat leh Thenzawl Vengthlang-ah chenna in pathum te chu thli leh ruah hian a tichhe nual bawk a ni. Thenzawl khuaa vanduaina thlenna hmun te hi nimin vek khan Serchhip District Bawrhsap David Lalthantluanga chuan a hmunah a tlawh nghal a, luahzui tlak loha In chhia te hnenah hian sawrkar in dan a neih angin zangnadawmna leh tanpuina sumfai Rs. 1,20,000/- theuh a hlan a, a bang In chhia 17 te pawh hi an In leh bungrua a chhiat nasat dana zirin tanpuina sum a hlan bawk a. Heng Village Council pahnih -Thenzawl Vengthar leh Thenzawl Venghlun-ah te hian hnatlang thingpui inna tur sumfai hlan bawkin nimini-a SDRF kaltlanga Thenzawl a chhiattawk te tana sumfai pekchhuah zawng zawng hi a vaiin Rs. 5,57,000/- a ni.


Serchhip District chhunga Vanchengte khua ah pawh niminpiah tlai-a thli leh rial thawk avang khan Lalhriatkima, Ramenga leh Ruatthanga te In chung chu a chhe vek a, heng bakah hian chhungkaw 10 te Inchung thenkhat chhiain Biak In choka chung a chhe bawk a. Thinglian khua a Rualthankhumi leh Vaninmawia te In pawh luahzui tlak loha chhiain In dang 14 te pawh In chung thenkhat thlak ngaiin a awm bawk a ni.

Serchhip P&E Veng-a Lalrammuani te chenna Inchung Rangva chu thli hian a zatve vel a lak sak a, Serchhip Vengchung-a Chhuanvawri te Inchung thenkhat pawh thli in lak sakin heng te hi nimin zing khan Addl. DC James Lalnithanga chuan a hmunah tlawhin thil thlen dan a enfiah a, sawrkar atanga tanpuina awm thei ang te hlanin heng In te hi nimin khan mi tlawmngai ten an Inchung hi an siamthat sak leh bawk a. Serchhip SP MS. Dawngkima pawhin Serchhip P&E Veng-a In chhia hi tlawhin a thawmthat hnatlang-a thawk te thingpui inna tur sum a hlan a. Thenzawl Joint VC te hnenah hnatlang thingpui inna tur sumfai a pe bawk a ni.


Niminpiah tlai-a thli leh rial in Serchhip District a nuai avang hian Serchhip DC Office-a Disaster Branch Emergency Call Centre chu niminpiah tlai atang khan zankhua in tihnun nghal a ni a, thawktu ten awmchilhin englai pawha biakpawh theih turin Emergency Call Centre biakpawh theihna Phone Number leh thil pawimawh dang te chu mipuite hnenah puanzar nghal a ni a, chhawmdawlna atana Silpouline mamawh te tan pawh nizan hmasa la la khan lakchhuah theih turin ruahmanna an siam nghal bawk a ni.

Comments

Popular News (Last 30 Days)

LPG man bithliah thar