Chief Minister in thuthar thehdarhtute zawhna a chhang

Chief Minister Lalduhoma chuan Mizoram atanga India rampawn a hnathawk tur thawnchhuah chungchangah siamthat hna an thawh thu a sawi.

Nimin-a Chief Minister Office Conference Hall-a thuthar thehdarhtute a kawmna ah zawhna chhangin Chief Minister Lalduhoma chuan India ram pawna hnathawk tur thawnchhuah theihna dan chu Mizoram-a siam theih a ni lo tih a sawi a, “Mizorama Congress Sawrkar lai khan India ram pawna hnathawk tur thawnchhuah theihna dan an siam a, chumi hmang chuan MNF Sawrkar khan mi eng emaw zat permit a pe a ni,” a ti a. Mizoram Sawrkarin Permit a pek avangin Agency-te'n India ram pawnah hnathawk tur an thawnchhuah ve ngawt thu sawiin, “Agency-te hian kan sawrkar hnuah min rawn hmu a, mi thawnchhuah theihna an neih loh avangin thawnchhuak tawh lo turin ka hriattir. India rampawna mi thawnchhuak tur chuan Immigration Act, 1983 hnuai Protector of Immigrant hnuaiah license neih a ngai,” tiin Protector of Immigrant hnuaiah License neih tum tura thurawn a pek thu a sawi a. Chief Minister chuan hnathawktu thawnchhuak tura Mizoram Sawrkarin dan a neih chu siamthat a nih dawn thu sawiin, “Hnathawk tur thawnchhuah ah a siamthat hna kan thawk mek,” a ti.

MPSC hnuaia hna lak dan-a thil fello awm nia hriat chungchang sawrkar in a chhui tirna chungchanga zawhna pawh chhangin Chief Minister chuan, “MPSC hna lak dan chhui tura Mizoram Sawrkarin a ruat M. Lalmanzuala, IAS (Rtd) chuan MPSC hnalak danah thil fel lo a hmu lo,” a ti a. “Kan mi rin em em a ni a, enquiry hi a uluk hle. A report pawh a chhah. Thil fel lo a awm lo tih chu a hmuhchhuah a ni,” a ti. Chief Minister sawi danin, M Lalmanzuala hian Correcting Fluid-a nawhreh chu uluk taka enin a la hmuh theih thu a sawi a, hei hi a dik ngei tih finfiah a ni. Sawrkar chuan M. Lalmanzuala report hi rintlakah a ngai a ni.

Zu zawrh leh zawrh loh chungchang mi an rawn tawh leh tawh loh zawhna pawh chhangin Chief Minister Lalduhoma chuan, “Tumah rawn kan la nei lo,” tiin Excise Minister-in tul a tih angin a la rawn chhawp chhoh tur thu a sawi bawk.