Serchhip Sub-Hqrs. YMA in Ramngaw, tuihna leh nungcha humhalh kawngah chak zawka hmalak an rel

Serchhip Sub-Hqrs. YMA Rorel Inkhawm vawi 4-na chu nimin khan Serchhip Auditorium-ah neih a ni a, ramngaw, tuihna leh nungcha humhalh kawngah Sub-Hqrs. YMA Serchhip hian chak zawka hmalak relin, tuihna humhalh tha Branch te hnenah chawimawina lawmman pek thin nise an ti.

Sub-Hqrs. YMA Inkhawmpui neih loh kuma neih thin, Sub-Hqrs. YMA Serchhip Rorel Inkhawm vawi 4-na hi nimin khan Serchhip Auditorium-ah an President Kawlthuama kaihhruaiin neih a ni a, chawhma lamah Sub-Hqrs. YMA Vice President PC. Vanlalluna chuan Palai kal te lawmna thu sawiin, Secretary K. Laltlanmawia leh Fin. Secretary H. Lalbiakhlua te hnen atangin Report ngaihthlak a ni a. An hmalakna an tarlan zingah Serchhip Sub-Hqrs. YMA huamchhunga raltlan te chhawmdawl leh tanpuina sum pek chungchang ah theihtawp chhuaha hmalak a nih thu te, Entlang Social Forestry hmunah Nagar Van Yojana hnuaiah cheng nuai 132 senga hmalak mek a nih thu te, Manipur tualchhung buaina avanga Zohnahthlak te tanpuina Vehbur an khawn atangin Rs. 3,00,000/- chu Manipur Group YMA-ah hlan a nih thu te, Green Mizoram Day pualin thingtiak 30 an phun thu leh Serchhip Sub-Hqrs. YMA Building-ah Sub-Hqrs. YMA Communication Centre tur cheng nuai 98 senga sak tura hmalakna kalpui mek a nih thu te a tel a ni.

Nimin-a Rorel Inkhawm ah hian kum kalta chhunga YMA Member boral mi 270 te sunna hun hmangin Mizote kan pian pun theihna tura hma an lakna ah fa nei tam mi 3- Fa 10 nei R.Siamkima New Serchhip Venglai Branch te nupa bakah Fa 7 ve ve neitu Lalchhuansanga, Hriangtlang Branch leh K. Lalengkima, Chhingchhip Venglai Branch nupa te hnenah chawimawina thuziak leh pawisafai an hlan bawk a ni.

Serchhip Sub-Hqrs. YMA Rorel Inkhawm ah hian Agenda YMA Khawih pali (4) leh Sawrkar Khawih pasarih (7), a vaiin 11 chhawp-chhuah a ni a, heng zingah hian YMA Khawih pali pawmin Ramngaw, Tuihna leh nungcha humhalh kawngah Sub-Hqrs. YMA in chak zawka hmalak nise an tih bakah Tuihna humhalh kawngah Sub-Hqrs. YMA in Tuihna humhalh tha Branch te chawimawina lawmman pe thin rawh se an ti a. Covid hri len hmaa YMA Inkhawmpui hrang hrang leh Rorel Inkhawm neih hun inang lo thin chu hripui a len hnuah a inang a kalpui a nih tak avangin siamthat leh nise tiin nakum-a Sub-Hqrs. YMA Inkhawmpui neih tur chu nei lovin Rorel Inkhawm neih leh nise an ti a, Branch YMA Chanchinbu enkawltute pualin Sub-Hqrs. YMA in Training buatsaih an rel bawk.

Hei bakah hian Sawrkar Khawih Agenda 6 chu pawm ni bawkin Mizoram Youth Commission (MYC) Coaching Centre Serchhip District-ah hawn a nih theih nan Sub-Hqrs. YMA in hmalak nise an ti a, Chhiahtlang to Hmuifang (via Lamchhip) kawng Blacktop a nih theih nana hmalak an rel bakah Cadre Allocation Policy 2019 AGMUT Cadre-ah Mizoram Cadre hran kan neih ve theih nan hmalak an rel a. Raltlan te tun aia khuahkhirha enkawl relin, Sub-Hqrs. YMA in ruihhlo ngai te enkawlna tur Home din a nih theih nan sawrkar-ah thlen nise an ti a. Kikawn to Lungpho kawng Jeepable Road chu tun aia changtlung zawka siam a nih theih nan Sub-Hqrs. YMA in hmalak nise an ti bawk. Hei bakah hian kum 2024-2025 Budget atan Rs. 11,40,800/- chu pawm a ni.

Serchhip Sub-Hqrs. YMA hi June 18, 2008-a din kha niin a huamchhung ah hian Group YMA 3- Tuichangral South, Tawitlang leh Vantawng Group te awmin Branch 74 a awm mek a, tun dinhmunah Member YMA 39,052 awmin kum hmasa aiin 900 in Member hi an pung a. Nimin-a Rorel Inkhawm ah hian Sub-Hqrs., Group leh Branch atangin palai mi 234 an tel a ni.