Lenkawl

 

Serchhip RD Block-a Block Development Officer (BDO), Dr. Lalramdintluanga chuan Mahatma Gandhi National Rural Employment Guarantee Act (MGNREGA) kalpui dan khirh tulh tulh anga lang chu Job Card holder leh Worker dik tak ten hna thawk tak tak chunga an hlawh tur dik tak an hlawh theih nana kalpui a nih vang tih a sawi.

Serchhip District Jail-a tang mek leh Jail-a thawktute tan Health Camp neih a ni a, a thlawnin damdawi sem nghal a ni bawk.

Mizo Zirlai Pawl (MZP) Headquarters Serchhip chuan nimin khan Serchhip Press Club-ah kum 2026-2028 chhunga hruaitu tur thlanna neiin President-ah Darchhuana (Chhim Veng); Vice President-ah Lalrinsanga (Vengchung); Secretary-ah Rosangliana (Hriangtlang/Chanmari Veng); Joint Secretary-ah Benjamin C. Lalrinmawia (P&E Veng); Treasurer-ah Jacinta Vanlaltleipuii (IOC Veng) leh Fin. Secretary-ah Prisky Zothanpuii (Dinthar Veng) te thlan an ni. MZP Hqrs. Serchhip hruaitute hi inthlan atanga ni 20 chhunga mawhphurhna inhlan tura tih an ni.

Nimin khan UPC Mizoram-a Serchhip Bial Pentecostal Youth Department (PYD) te chuan Serchhip Blood Bank-a dah turin thisen Unit 17 an pe a, thisen petute hi mipa 10 leh hmeichhia 7 niin Serchhip Blood Bank-ah kalin thisen hi an pe a ni.

Mizoram-a Muga pangang khawitute mamawh Muga Pangang tui siamchhuahna hmun tur atan Thenzawl-a State Sericulture Farm chu Central Silk Board, Ministry of Textile Government of India hnenah pek a ni dawn.

Mizo Students’ Union (MSU) General Hqrs. hruaitute chuan sawrkar hnathawk aikal la te chung-changa an thurel bawhzuiin nimin khan School Education Minister Dr. Vanlalthlana hmuin Zirtirtu aikal la mi 14 an awm thu an thlen a, hemi rual hian hma la tur leh bawhzui turin Education Minister hi an ngen bawk. Education Minister chuan MSU hruaitute chu a bawhzui tur thu leh hmalak nghal a nih tur thu a lo hrilh a ni.

Aizawl Municipal Corporation (AMC) Ward 19-a inthlannaa chuh tumte tan inhnuhdawh hun chu nimin tlai dar 3:00 khan tawpin inhnukdawk an awm lo a, ZPM, MNF leh Congress ten Candidate 19 theuh neiin BJP in Candidate 11 an nei dawn a ni.

April 21, 2026-a Aizawl Municipal Corporation (AMC) inthlanpui lo awm tur atan Political Party hrang hrang ten ngawrh takin Campaign an kalpui mek.

Minister of State Lalnghinglova Hmar chuan nimin khan New Delhi-ah Asian Development Bank (ADB) hotute kawmin Sports leh Tourism hmasawnna tura ADB atanga tanpuina awm thei te an sawi a; Finance Ministry lam nen an inkawm bawk.

Tunhnai a phalna nei lova Mizorama lo lut ramdang mi 2-te chu thubuai siamsak lova thawnkir an ni tawh.

Chief Secretary Khili Ram Meena chuan mipuite chu Gas leh tuialhthei sem chungchanga harsatna tawk leh man to zawka hralh chingte sawrkar hotute hnena thlen turin a hriattir.

Hnahthial District Hospital-a damlo awmpuitute hahdamna leh riahna hmun tur - Patient Attendant Shelter chu nimin khan Bialtu MLA Jeje Lalpekhlua chuan a hawng.

Association for Voluntary Blood Donation (AVBD) Champhai District-a Asst. Secretary, PC. Lalchuangkima chuan nimin khan Champhai District Hospital Blood Bank-ah a vawi 100-na atan thisen a pe a, Mizoram-a vawi 100 thisen pe thei hmasa ber nia hriat a ni. Mizoram-a thisen pe tam ber record siam mektu, C. Lalremruata, Aizawl Electric Veng chuan midangte ten thisen vawi 98 pe tawhin hei hi PC. Lalchhuangkima hian a rawn khum a, AVBD Champhai District chuan chawi-mawina thuziak an hlan a ni.

Mizoram Excise & Narcotics Department chuan kum 2024 atanga kumin January ni 31 thleng khan Mizoram Excise Act, 1974 hnuaiah mi 702 man niin thubuai 752 ziahluh a ni a, hemi hun chhung vek hian Mizoram Liquor Prohibition (MLP) Act, 2019 hnuaiah mi 10, 474 man niin thubuai 11, 561 ziahluh a ni bawk. END hotute chuan ruihhlo do kawngah nasa zawkin tan an lak dawn thu sawiin, ruihhlo zuar leh ti thinte chu dan hnuaiah khauh taka hremna pek zel an nih tur thu an sawi a ni.

Indian Red Cross Society (Mizoram Branch) chu nimin khan an Chairman thar leh Health & Family Welfare Department changtu Secretary K. Lalrinzuali hovin SAD Conference Hall-ah an thukhawm a, kum kaltaa IRCS (Mizoram Branch) hmalaknate an thlirho bakah kumin atana hmalak lehna turte an rel a. Kumin World Red Cross Day (May 8) puala Mizorama District-te huam tura hmalak dan turte ngaihtuah niin a theih ang anga Branch huang zauhna tur leh mipui vantlang tana hlawk zawka kal zeldan turte an rel a ni bawk.

Nimin khan State Level Monitoring Cell on LPG/POL chu Food, Civil Supplies & Consumer Affairs Department changtu Secretary Teresy Vanlalhruaii hovin a Pisa-ah an thukhawm a, he hunah hian tunlai Gulf region buaina avanga India ram leh khawvel hmun hrang hranga Gas leh a kaihhnawih buaina awm mekah Mizoram chhung dinhmun chu a that thu tarlan niin, mipuite an chi-ai mai lohna tur leh buaina a awm loh nana sawrkar hmalakna hrang hrangte thlirho a ni a, buaina tipunlun thei thil Hoarding,diversion leh Black marketing te a awmlohna tura sawrkar hmalakna te pawh thlirho a ni bawk. He thutkhawm ah hian sawrkar Official te bakah Mizo Consumer Union,Mizoram Indane Distributors Association leh RGGLV Distributors te atangin harsatna an tawhte ngaihthlak niin hmalak zel dan turte an sawiho nghal bawk a ni.

United Pentecostal Church-North East India (UPC-NEI) hnuaia Pentecostal Youth Department (PYD) Serchhip Bial te chuan Inrinni khan Hmawngawn lui dung thenfai hnatlang an nei.

March ni 26, 2026 atanga Chhattisgarh (Raipur)-a ‘1st Khelo India Tribal Games’ neih chu nimin khan zawhfel niin Weightlifting-a Mizoram aiawha Serchhip District atanga kal zingah Zosangzuali (Keitum) chuan +86 kg. Category-ah Gold Medal a la a, amah chiah hi Hmeichhia a Mizoram tana Gold la niin Mipa in Gold 3, Silver 3 leh Bronze 1 an la a ni.

Serchhip Zawlpui Agro Farmers Producers Company Ltd. chuan Inrinni khan Serchhip Mat Phai, Zawlpui Zau-a Sunflower (Nihawichi) chinna hmun an tlawh a, Guwahati atangin APRINS Project Co-ordinator Papori Chutia leh Zonal Co-ordinator Udipta Buragohain ten an telpui a ni.

Kristian te ni pawimawh ‘Tumkau Ni’ chu nimin khan khawvel hmun hrang hrangah Kristian ten ropui leh urhsun takin an hmang.

Serchhip Bialtu MLA leh Chief Minister Lalduhoma chuan Zirtawpni khan ‘Thenzawl PWD Road Division’ hawngin he Office hi thla thar April 1 atangin mipuite tan dawr theih a ni ang.

Thenzawl Lothazawl Playground-a Artificial Football Turf phah tur lungphum chu Zirtawpni khan IPR&PS Minister B. Lalchhanzova chuan phumin cheng vbc. 10.33 sengin hna thawh a ni ang.

Gauhati High Court chuan Sairang leh Vairengte inkar kawngpui siamthat hna thawktu pakhat chu hna an la zawh loh za zela 65 chu engtin nge April thla chhunga an zawh theih dan tur a zawt.

Mizoram Civil Pensioner Association (MCPA) chuan Mizoram Universal Health Care Scheme (MUHCS) 2.0 chu Pensioner te tan tha an ti lo tih sawiin, MUHCS 1.0 hman chhunzawm tir turin Mizoram Sawrkar an ngen a, Pensioner tam zawkin MUHCS an zawm theihna tura hmalak an inhuam thu an sawi bawk.

Champhai District Khuangleng khaw daia John Lalrinchhana Ar vulhna, Steven Poultry Farming hmuna Ar vulh lai, White Leghorn 811 vel chu Zirtawpni zan khan Ui-in an seh hlum nia hriat a ni a, Ar dang 150 leh Ar note 37 bawr vel chin hriat lohin an awm bawk.

Mizoram Journalist Association (MJA) chuan Zirtawpni kalta, March 27, 2026 khan General Conference vawi 52-na hmangin an pawl hruaitu tur an thlang nghal bawk.

Sawrkar hnathawkte'n mipui tana tangkai zawk leh tha zawka an hnate an thawh theih nana ruahmanna hrang hrang sawihona chu Zirtawpni khan neih a ni a, Chief Secretary Khilli Ram Meena chuan he hun hi a kaihruai a ni.

Agriculture & Farmers’ Welfare Department changtu Minister PC. Vanlalruata chuan Kerala tlawhin Cocoa chin kawnga an hmalakna hrang hrangte a zirchiang.

ZPM Thalai General Hqrs. hruaitute chuan National Highway-06 siamthat hna thawh mek endikna an neih mekah kar kalta Zirtawpni khan Four Lane in a khawih loh tur enfiah lehin Khamrang - Sairang chu J. Infratech Pvt. Ltd. leh BR Goyal Pvt. Ltd ten enkawlin, J. Infratech Pvt. Ltd. te hian RCC-a chhun turah 80% leh Resurfacing turah 60% an zo tawh a, BR Goyal Pvt Ltd. te chuan Black topping & Re-surfacing an thawh turah 80% leh RCC-a chhun turah 100% an zofel tawh bawk a, Company hotute sawi danin ni 15 chhung a zofel thei turin an inbeisei a ni.

Urban Development & Poverty Alleviation (UD&PA) Department, Aizawl Smart City Limited (ASCL), Aizawl Municipal Corporation (AMC) leh Central Young Mizo Association (CYMA) tangkawp, Aizawl Khawpui Faina atana Coordination Committee buatsaih, ‘Aizawl Khawpui Faina Hnatlangpui leh City Branch YMA Fai Intihsiak’ chu Inrinni zing khan Aizawl Vanapa Hall kawtah a khuhhawnna neih a ni a, Aizawl khawpui hmun hrang hrangah Faina Hnatlang neih zui nghal a ni. 

Mission Organic Mizoram (MOM) enkawl Company te kaltlangin Mizo Hmarcha chu kumin ah a vawi khat nan hralhchhuah a ni.

Thla thar April 21-a Aizawl Municipal Corporation (AMC) Inthlanna neih tura chuh tuma hming pelut te tana inhnuhdawh hun chu Vawiin, March 30, 2026 tlai dar 3:00 hian a tawp dawn ta a, Ward 19-a inthlanna neih tur chuh tum hian mi 68 in hming an pelut a ni.

Inrinni (March 28, 2026) tlai dar 2:00 leh 3:00 inkar khan Lawngtlai District chhung, Sangau RD Block huamchhunga Thaltlang khua chu ruah leh rial in nuaiin In 13 chu luahzui tlak lohin a chhia a, In dang 28 pawh a chhe nual bawk. Thaltlang khua hi In 110 awmna khua a ni a, chhiatna thlenna hmun hi sawrkar mi pawimawh ten tlawh nghalin chhawmdawlna hna thawh nghal a ni.

Mizoram State Project Monitoring Committee (MSPMC) chuan tunhnaia Project hrang hrang an endik te thlirin Nilaini kalta khan Planning & Programme Implementation Department Conference Hall-ah Review Meeting an nei a. MSPMC hian sawrkar kum kallai (April, 2025 - March, 2026 chhung) hian Project hrang hrang 72 an endik tawhin Inspection neiin vawi 82 an feh chhuak tawh a. Chung zinga Project 16, tunhnaia an endikte report chu he hunah hian thlirho niin rel ngai leh bawhzui ngai pawimawh hrang hrangte an sawiho bawk a ni.

Food, Civil Supplies & Consumer Affairs Dept chuan Mizoram-ah nitin mamawh eitur leh tuialhthei te dan pangngaiin chawkluh reng a ni tih sawiin, mipui supply pek kawngah harsatna a thlen loh thu an sawi a. FCS&CA Department Secretary Teresy Vanlalhruaii chuan, eirawngbawlna Gas leh tuialhthei te chu Mizoram-ah ni tin a lo thleng reng tih sawiin, khawthlang lama Indo a awm avangin mi thenkhat chuan eirawngbawlna Gas leh tuialhthei a harsat hlau in an inla khawl a, amaherawhchu hlauhthawn ang te thleng lovin heng supply te hi a pangngai rengin a rawn thleng tih a sawi a, tun dinhmunah chuan hlauthawn tur a awm lo niin a sawi bawk. Teresy Vanlalhruaii chuan tul lo a mipui lamin Gas leh tuialhthei an lak lawk vak vak loh nan Gas chu book hnuhnung ber atanga ni 25 hnuah chauh a book leh theih tih a sawi a, hei hi mi thenkhat in midang chan ve tur an lo lak heksak lutuk tur venna a ni tih a sawi bawk.

Nimin khan Serchhip-ah Reserved Forest chungchang ngaihtuahin District Level Committee chu Bawrhsap, Paul L. Khuma hovin an thukhawm.

Nimin khan Aizawl Vaivakawn Cultural Centre-ah ‘State Level Viksit Bharat Youth Parliament 2026’ neih niin Govt. Serchhip College atanga tel zingah Malsawmzuali (2nd Sem BA) chu pahnihna a ni a, Mizoram aiawha National Level-a inelna tel turin a tling a ni.

College of Horticulture, Central Agricultural University (CAU), Thenzawl buatsaihin nimin khan Thenzawl-a Horticulture College-ah ‘One day Farmer-Scientist Interaction Programme-cum-Farmers' Fair’ neih a ni.

Telecom Regulatory Authority of India (TRAI) chuan Serchhip District Consumers Association (SDCA) te hmalakna chu nimin khan a hmunah kalin an rawn enfiah.

Mizoram Universal Health Care Scheme (MUHCS) 2.0-ah Pensioner tih loh, Sawrkar hnathawk nghet, mi nawlpui leh Golden Card neite tan thil thlak danglam a awm lo a, Mizoram sawrkar hnuaia thawk mek All India Service leh Central Service ten MUHCS 2.0 an zawm ngei a ngai tawh dawn thung.

Thla thar April 21-a Aizawl Municipal Corporation (AMC) Inthlanpui neih tura chuh tumte tana hming pekluh theih hun chu nimin khan tawpin heng hming pekluh te hi naktuk-ah enfiah a ni ang.

Lunglei Municipal Council (LMC) Board of Councillors (BoC) chu niminpiah khan Lunglei Convention Centre-a BoC Meeting Hall-ah Vice Chairman K.Lalrinawma kaihhruaia thukhawmin kum 2026–2027 chhunga LMC Budget atana ruahman Rs. 18,95,62,000/- chu pawm a ni a. LMC huamchhunga Veng fai inelna buatsaih nise tih relin, hemi atan hian cheng nuai nga ruahman a ni a; Municipal Sanitation Committee bawhzui tura dah a ni bawk. He thutkhawm kaihruaitu LMC Vice Chairman chuan LMC Councillor-te chu an Ward an enkawlna theuhvah theihtawp an chhuaha a hriat thu leh eirukna leh hlemhletna lakah pawh an fihlim tlang hle nia a hriat thu sawiin, lawmawm a tih thu a sawi bawk.

Planning & Programme Implementation Department buatsaih, Economic Survey 2025-2026 Bu-a tarlan a nih danin kum 2025 chhung khan lirthei 78,729 te chu khu an pekchhuah dan enfiah niin an zinga 78055 ten endikna an paltlang zawh laiin paltlang zo lo 674 an awm bawk.

Mizoram Universal Heathcare Scheme (MUHCS) 1.0-a Pensioner ten hamthatna an neih ang chu MUHCS 2.0 ah an nei tawh dawn lo a, hei hi Pensioner te pawisa thawh leh an hmanral a inthlauh lutuk vang niin, Category hrang hrang zingah chawhrualin pensioner-te'n sum an hmang tam ber tih Finance Secretary Ramchuana chuan a sawi.

Mizoram Larsap General (Dr) Vijay Kumar Singh chuan Silk hrang hrang tharchhuah tamna khawpui ni turin theihna kan nei tih sawiin, hemi tur hian tan erawh kan lak nasat lehzual a tul tih a sawi.

Mizoram Larsap General (Dr) Vijay Kumar Singh chuan Mizo thalaite chu pianpui thiamna nei tha leh thawkrim an nih thu a sawi.

Champhai District chhunga awm Leithum khua chuan nimin khan ‘Leithum Haw Runpui’ an nei a, he hun hi Art & Culture Minister C. Lalsawivunga leh Bialtu MLA, Ramthanmawia te chuan an hmanpui a ni.

Nimin khan Serchhip-ah District Level Workshop on Handholding Scheme neih niin Mizoram State Policy Coordination Committee (MSPCC) Member te leh Handholding Scheme CEO ten hun an rawn hmang a. Serchhip District-ah Bana Kaih hnuaia loan dilna 29 chu Bank in pawm tawhin sanction a ni tawh tih he hunah hian tarlan a ni.

Serchhip Dinthar Veng Sesah Lui-a tui luanna chu siamthat tum niin hei vang hian Serchhip paltlang tur lirthei thenkhat tlan dan tih danglam a ni.

Khawvel puma TB natna dona ni, ‘World TB Day’ chu nimin khan hmun hrang hrangah hman niin Serchhip-ah pawh ‘Yes! We Can End TB! Led by Bharat, Powered by Janbhagidari’ tih thupui hmangin he ni hi hman a ni.

Directorate of Printing & Stationery chuan Academic Session tan hmain Textbook-te Samagra leh Textbook Dealer-te hnenah hlan vek a nih thu sawiin, District zawng zawnga zirlaite hnenah sem a nih theih nan Mizoram chhunga District tinah heng zirlaibute hi thlen hman vek a nih thu an sawi.

Mizoram atanga Indian Football League khelh Team pahnih te nizan a inhmachhawn ah Aizawl FC in hnehna an chang.

East Tuipui Bial chhunga awm Vangchhia khua chuan nimin khan ‘Haw Runpui’ neiin Bialtu MLA, Ramthanmawia chuan khuallian niin a hmanpui a ni.

Mizoram-ah Vaihlo, Zuk leh hmuam ti za zela 58.7 an awm anga chhut niin India ramah a sang pawl nia chhut a ni.

Press Information Bureau (PIB), Jalandhar (Punjab) bultumin Punjab leh Himachal Pradesh-a chanchinbu mi te chuan Mizoram-ah Press Tour rawn nei mekin nimin khan Aizawl Press Club an tlawh a, MJA Member te nen an inkawm a ni. Mizoram-a Press Tour nei mekte hi Punjab leh Himachal Pradesh-a chanchinbumi paruk an ni a, PIB, Jalandhar-a Media and Communication Officer Dr. Vikram Singh chuan hruaiin March 22, 2026 khan Aizawl an rawn thleng a, Mizorama hmun hrang hrang tlawh tawhin tun thla ni 28 khian Mizoram an chhuahsan dawn a ni. Nimin-a Aizawl Press Club an tlawhna ah hian MJA Member te nen inkawmin an hnathawh dan te an sawiho a, hemi hnu hian I&PR Directorate pawh tlawh nghalin, IPR Director K. Vanlalsangi leh Officer dangte nen an inkâwm bawk a ni.

National Livestock Mission hnuaia Livestock Insurance programme chu nimin khan Champha-ah AH&Vety Minister, C. Lalsawivunga chuan hawngin Mizoram Bana kaih kaltlanga ranchaw intodelhna project ‘Maize and Soyabean contract farming for Animal Feed Production’ hnuaia Vaimim chi sem tur a vailiam nghal bawk.

Kum kalta 2025 chhung khan Mizoram-ah TB natna vei mi 2275 hmuhchhuah niin TB vanga thi mi 145 an awm bawk.

Mizo Zirlai Pawl (MZP) chuan Mizoram rawn tlawhtu(Tourist) hrang hrang lo pung chho mekah khualpang zin leh thildanga Mizoram rawn tlawhtute chu Mizo nunzia leh khawsakphung te an ngaihpawimawh leh zah tura an beisei thu leh an phut thu an sawi.

 Mizoram BJP chuan thla thar April 21-a Aizawl Municipal Corporation (AMC) inthlan lo awm tura an candidate turte chu nimin khan Aizawl-a an party Office-ah an puang a, BJP hian Ward 19 awm zinga an Candidate tur mi 11 te puangin Ward No. I, II, IV, VII, VIII, IX, XI, XIII, XV, XVIII leh XIX te an chuh dawn a, an President Dr. K. Beichhua chuan a puang a ni.

Thla thar April 21-a Aizawl Municipal Corporation (AMC) Inthlanna neih tur atana MNF Party Candidate te chuan nimin khan an Bialtu Returning Officer te hnenah Nomination an file a, MNF Party hian a hma lamin an Candidate turte hi puang tawhin AMC Ward 19 chu an chuh vek dawn a, an Candidate te hi Vote turin MNF chuan an sawm a ni.

Chief Minister Office-a Mizo Diaspora Cell chuan nimin khan Mizoram pawna Mizo Welfare leh Association hrang hrangte nena inkawmna (Online Meeting) buatsaihin Mizo Diaspora Cell hnathawh dan leh Mizo DiasporaHub hman tangkai dan turte an sawiho a. Mizo Diaspora Cell-a Chairman Vanlaldina Fanai chuan Mizo Diaspora Cell din chhan chu khawvel hmun hrang hranga awm Mizote inhuikhawm a, a tul huna intanpui a ni tih sawiin, harsatna tawk, a bik takin ram pawn lama awm mi engemaw zat an lo tanpui tawh thu leh an tanpui mek bawk thu a sawi a. “Mizoram pawna chenghote hlim leh thlamuang taka awm turin kan duh che u a ni,” a ti bawk.

Tourism Minister Lalnghinglova Hmar hovin Tourism Department Officer-te leh Mizoram Synod aiawhte chu nimin khan inkawmin Mizoram tlawhtu khualzin pung zel lo dawnsawn kawnga thawhho dan tur an sawiho a. He hunah hian Tourism Minister chuan Mizoram tlawhtu pung zel chu thil lawmawm tak a nih rualin fimkhur taka lo dawnsawn a tul tih a sawi a. Kum 2025 chhungin khualzin mi nuai 8 chuang an awm thu leh kumin ah a aia tam an awm an beisei tih sawiin, khualzin lo kal belh zel tura an duh rualin mi chi hrang hrang lo lutin thil tha lo kentel a neih theih avangin chung laka lo inven leh dawnsawn kawngah nasa zawka zirtirna kalpui a ngai tih a sawi a ni.

Kum 2026-2027 Academic Session atan nimin khan Elementary School te chu hawn tan a ni leh ta a, nimin vek khan Samagra Shiksha, Serchhip District te pawhin zirlai naupangte hnena zirlaibu sem tur chu Serchhip atanga vailiamin kumin-a zirlaibu sem tur chu a rawn thleng kim tawh nia thudawn a ni.

Excise & Narcotics Department-a Commissioner, Z. Lalhmangaiha chuan Annual Inspection neiin nimin khan Serchhip a rawn tlawh a, Serchhip-a an Department-a thawktute nen an inkawm nghal bawk.

Lawngtlai Bawrhsap Donny Lalruatsanga chuan kumin Chapchar Kut-a ‘Chief Minister Chawimawina Nopui’ dawngtu Lawngtlai-a cheng, Henry Lalhmingmuana nimin khan a Pisa-ah chawimawina thuziak leh pawisafai a hlan.

Khawvel puma tui pawimawhna inzirtirna ni ‘World Water Day’ chu nimin, March 23, 2026 khan hman niin Aizawl-ah pawh Dawrpui Multipurpose Hall-ah he ni pual hian hun hman a ni.

Lunglei leh Tlabung inkar National Highway-302 sial zauh leh laih that hna thawh mekin Tlabung khawchhung a thlen tawh avangin khawchhung-a chenna In engemaw zat thiah a ni tawh a. Hemi atan hian Competent Authority for Land Acquisition (CALA) chuan hriattirna tichhuakin, National Highways Act 1956 hmanga Sawrkar-in ram a lak tawhte chu mimal leh pawl tan cheibawl zui theih a nih tawh loh thu leh, zangnadawmna dawng tawhte pawh kawngin a sut tura lak - Right of Way huamchhunga an bungrua leh thil neih te senghawi tura hriattir an ni a, tun dinhmunah Tlabung khawchhunga chenna In thahnem tak chu thiah ni tawhin senghawi loh la awm te pawh senghawi tura tih an ni bawk.

Lunglei Pukpui-a din, Mizoram Engineering College (MEC) chu kum 2026-2027 Academic Session-a Class tan theih beisei a ni.

Taxation Enforcement Wing chuan tunhnai khan Mizorama Private Coaching Centre endikin Goods & Services Tax (GST) an pe mumal lo tih an hmuchhuak.

Aizawl Municipal Corporation (AMC) inthlanna neih turah mipa aiin hmeichhe vote nei an tam zawk a, Ward No. 18 chu Voter tamna ber Ward a ni.

Mizoram Pradesh Congress Committee (MPCC) chuan Aizawl Municipal Corporation (AMC) Inthlan lo awm tur atana an Party Candidate turte nimin khan puangin an Manifesto an tlangzarh nghal bawk.

Aizawl Municipal Corporation (AMC) Inthlanpui lo awm tura ZPM Party Candidate te chu nimin khan puangin AMC Election Manifesto pawh tlangzarh nghal a ni.

Labour, Employment, Skill Development & Entrepreneurship (LESDE) Department-ah thalai hna zawng lai inziaklut mi 21,090 an awm mek.

Aizawl Traffic Police te chuan Pathianni (March 22, 2026) khan Aizawl Veng hrang hrangah kum tling lo lirthei khalh venna leh an him zawkna atan beihpui thlakin dan bawhchhia thahnem tak an man a. Tun tumah hian kum tling lo lirthei khalh mi 80 an man bakah, Driving Licence nei lo mi 23, Helmet khum lo mi 51, Rui chunga lirthei khalh 6 leh dan bawh-chhiatna dang avangin mi 148 an man bawk a, a theih anga hmalak chhunzawm zel tum a ni.

Nikum (2025) June 23 atanga Mizoram sawrkar Mizoram Synod leh Tlawmngai pawl ten ruihhlo ngai te chhanchhuahna tura Hulhliap-Short Stay Centre (SSC) an buatsaih chu a Batch hnuhnung ber tur leh Batch 9-na ni turin nimin khan neih tan leh a ni a, he thu buatsaih lai hian mi 245 bawr vel an inziaklut tawh a. Batch dang ang thovin tun 9th Batch-ah pawh hian ni 15 chhung Sawrkar in a enkawl anga, a tawp ni 5 chu Synod Revival Gospel Team in an enkawl dawn a ni.

Central Bureau of Communication, Field Office Aizawl chuan nimin khan CTI Sesawng-ah Viksit Bharat 2047 pualin Special Outreach Prog-ramme an buatsaih a, he hun hi MRHG&CD-a Contre Commander, Lalhuapzauva chuan hman-puiin India-in zalenna a hmuh kum 100-na puala ram hmasawn bik te huanga tel ve a tumna-ah tha thawh tum theuh turin kalkhawmte a chah a ni. 

Mara Autonomous District Council (MADC) Budget Session chu nimin khan neih tan niin ni li (4) chhung a awh ang. MADC thutkhawm hi an Chairman N. Viakhu chuan kaihruaiin chawhma lamah zawhna leh chhanna hun hman a ni a, chawhnu lamah ‘The Mara Autonomous District Council (Sericulture Department Group A, B, C & D Posts) Recruitment Rules, 2026’ chu putluh niin kum 2026-2027 Budget Estimate chu CEM, M. Laikaw chuan a pharh bawk a, Official Rule putluh hi Vawiin-ah sawiho a ni anga, Budget Estimate 2026-2027 erawh March ni 27-ah sawiho a ni ang. Tun tuma MADC thut-khawm ah hian Starred Euestion 33 leh Un-Starred question 7 a lut a ni.

Nimin-a Lok Sabha thutkhawm ah Mizoram Lok Sabha MP Richard Vanlalhmangaiha chuan Mizoram châk lakna kawng pawimawh ber, Mizoram 'lifeline', Vairengte atanga Sairang kawng, a bîk takin Kawnpui atanga Sairang kawngpui National Highway 6 chhe lutuk chungchang sawiin, “He kawngpui hi NHIDCL enkawlna hnuaia awm niin, Balaji Constructions, Jandhu Constructions leh BR Goyal Contructions Private Limited Company hnathawh a ni a. NHIDCL official te pawh ka sawipui tawh a ni. Kum hmasa lamah Fûr laiin kan tuar nasa tawh hle a, tunah pawh an hna a muan avangin hetianga an thawh chuan kumin Fûr hmain an thawh zawh hman loh a hlauhawm a ni,” tiin kumin Fur hmaa hna an zawh theihna tura ngaihsak turin a ngen a ni.

 

Mizoram sawrkar in ruahmanna a siam angin kum 2026-2027 Academic Session atan Vawiin March 23, 2026 hian Elementary School te chu hawn tan a ni dawn ta a, School tam ber te chuan an School-a lut turte tan Admission tihna hun lo hawng tawhin Vawiin hian Class neih tan a ni ang.

Inrinni kalta, March 21, 2026 kha North East India UPC Thalai pawl, Pentecostal Youth Department (PYD) dinchamphaphak a ni a, he ni hi hmun hrang hrangah urhsun taka hman a ni.

SEDCA Season Opening Tournament khelh zawh takah Thenzawl CC chuan Tuikhuah Veng CC hnehin an Champion ta.

Khawvel puma ramngaw humhalh a pawi-mawh zia inzirtirna ni, International Day of Forests (World Forestry Day) chu March 21, 2026 khan hman leh niin Thenzawl Forest Division pawhin Inrinni khan hemi pual hian hun an hmang a ni.

Artificial Limbs Manufacturing Corporation of India (ALIMCO) hnuaia Association for Social Service and Rehabilitation of the Aged (ASSRA) te hmalakna hnuaia Serchhip District-a Vohbik leh kum 60 chin chunglam tana Assessment Camp neih chu zawhfel a ni ta a. East Lungdar-ah kum 60 chunglam mi 43 leh rualbanlo mi 3; Serchhip-ah kum 60 chunglam mi 51 leh rualbanlo 15; Chhingchhip-ah kum 60 chunglam mi 25 leh rualbanlo mi 9 bakah Thenzawl-ah kum 60 chunglam mi 56 leh rualbanlo mi 4 te chu ALIMCO-ah an bungraw mamawh ang te dilpui an ni dawn a, tun thla ni 27 thlengin document thehluh theih a ni ang.

Power & Electricity Department in kum 2026-2027 chhunga mipui hnena kawlphetha pekchhuahna atana sum leh pai a mamawh (Aggregate Revenue Requirement) chu cheng vbc. 761.15 nia chhut a ni a. Eng chhit man tihsan a nih dawn loh avangin sawrkarin sum indaihlohna phuhruk nana a tumsak (subsidy) tur chu cheng vbc. 175 a ni.

Mizoramin Thlawhna tum hmun a neih awmchhun Lengpui Airport cheithat hna chu harsatna a awm loh chuan April 2026 thla laihawl velah zawh hman tum a ni.

Mizoram Food & Allied Industries Corporation Limited (MIFCO) Board of Directors Meeting vawi 100-na chu Zirtawpni khan MIFCO Chairman Lalthazuala Rawite hovin a Pisa-ah neih a ni.

Sawrkar hnathawk pension zinga Mizoram Universal Health Care Scheme (MUHCS) 2.0 zawmte’n an kawppuite inenkawlna bak an bill thei tawh dawn lo.

Khawvel puma Adventist Kohhran thalaiten kumtin-a an lo neih thin, Global Youth Day chu Mizoram-ah pawh Inrinni khan hman a ni a, he ni pual hian Sermon ngaithla ngawt lova mahni ngei Sermon ni turin Adventist Kohhran thalaite an chêtchhuahna ni atana ruat a ni. Global Youth Day hi March ni 13, 2013 khan din tan niin thupui atân ‘Be the sermon’ tih chu hman a ni a, hemi hnuah hian kumtin thupui thlan bîk neih thin niin, kumin ah atan 'Communion In Action' tih chu thupui atan hman a ni.

National Investigation Agency (NIA)-in tunhnai a Mizoram a dan kalha lut-a Myanmar-a lut chho zui a puha an mante chu Lengpui Airport atanga lo lut an ni lo.

Champhai Divisional Forest Officer (DFO) Lalbiakchama Chawngthu chuan tunhnaia Zawlsei khuaa Chinghnia paruk kahhlum anga Social Media-a thu thang chu chhui a nih thu a sawi.

Zirtawpni kalta tlai-a Rial tla vak chuan Mamit Luangpawl Veng-a chenna In 62 leh School leh Kohhran In 2, a vaiin In 64 chu a deng chhia a, heng zinga chhungkaw 5 te chhenna In te chu luahzui zel tlak loh khawpin a chhia a, sawrkar chuan a theih angin chhawmdawl hna a thawk a ni.

Planning & Programme Implementation Department buatsaih, Economic Survey 2025-2026 Bu-a tarlan a nih danin kum 2025 chhung khan lirthei 78,729 te chu khu an pekchhuah dan enfiah niin an zinga 78,055 ten endikna an paltlang zawh laiin paltlang zo lo 674 an awm bawk.

Siaha District chhunga Siaha leh Rawmibawk inkar PMGSY Road-a awm Tuisumpui lui a Bailey Bridge (TDR) chu Inrinni khan PWD Chief Engineer (Road) David Sapzova chuan a hawng a, he Lei hi ft. 170-a thui niin Riasika, Amotlah leh Thiahra khua te thlunzawmtu leh District dangte nen a in kalpawhna pawimawh tak a ni bawk a, Fur laia heng khua te lirthei a tlawhpawh mumal theih loh pawh tlawhpawh theih a ni tawh dawn a ni.

Kar kalta Nilaini atanga Ramhlun Sports Complex-a neih Doordarshan Indigenouse Games & Cultural Festival 2026 chu Inrinni khan zawhfel a ni ta a, Mizo infiamna hrang hrang hmanga inelna hunah hian Infiamna chi hrang hrang 9, Insuknawr, Inbuan, Insuknawr Tangho, Invawr, Kawikah, In-Arpasual, Kalchhet kal tangho, insaihruipawh leh Kalchhet kal mimal te hmang a inelna neih a ni a, infiammi 352 telin heng zinga mi 126 chu hmeichhia niin mipa 226 an tel a. Aizawl-a Veng 13 bakah Aizawl pawn khua 12 leh India ram pawn Poland atangin infiam mi pakhat a tel bawk.

Inrinni kalta, March 21, 2026 khan ‘Down Syndrome Day 2026’ chu khawvel pumah hman niin Mizoram-ah pawh anmahni duhsaktute leh hmangaihtute chuan he ni hian an tan duhsakna chibai an buk a. Chief Minister Lalduhoma chuan Down Syndrome Day pual hian Social Media kaltlangin Down Syndrome te leh hmangaih taka anmahni enkawltute zawng zawng chibai bukin, an tana theihtawp chhuah reng thin Mizoram Down Syndrome Association chungah lawmthu a sawi a. “Down Syndrome te hian kaihruaitu leh zirtirtu tha an neih phawt chuan engkim an ti ve thei vek a, duat takin i enkawl zel ang u,” a ti. Social Welfare Minister Lalrinpuii pawhin World Down Syndrome Day pualin Mizorama Down Syndrome te chibai a buk a, hun hlimawm tak hmang turin duhsakna a hlan a ni.

 

Ni hnih chhung awh Mizoram Inter-District Senior Weightlifting Championship 2026 chu nimin khan Kolasib-ah zawhfel niin Serchhip District atanga Lifter kal pathum te chuan Medal an la vek a. Zosangzuali (Keitum) leh Lalduhsanga (Serchhip) ten Gold la ve ve in Lalrinhlua (Thenzawl) chuan Bronze a la bawk a ni. He intihsiakna hi niminpiah atang khan neih niin District hrang hrang atangin ritchawi chak an tel a. Zosangzuali (Keitum) leh Lalrinhlua (Thenzawl) te hi March 25 atanga April 3, 2026 chhunga Chhattisgarh-a Khelo India Tribal Games neih turah Mizoram aiawh turin an kal dawn bawk a ni.

Mizoram Civil Pensioners’ Association (MCPA) Serchhip District Hqrs. chuan nimin khan Serchhip Kawnpui VC Hall-ah General Conference hmangin Serchhip Bawrhsap Paul L. Khuma chuan khuallian niin a hmanpui a ni.

District Hospital Serchhip in NQAS leh LaQshya Certification lawmna chu nimin khan District Bawrhsap Paul L. Khuma hovin hman a ni a, Bawrhsap chuan Damdawi In-a thawktute chu an tawngka chhuak chu mi tan damna a nih rualin mi natna belhchhahtu a ni thei a ni tih vawng reng turin a chah bawk.

Serchhip District Cricket Association (SEDCA) buatsaih Season Opening Tournament chu Vawiin hian Final khelh a ni dawn.

Nimin khan Serchhip-a ranvulhtute tan Livestock Insurance kick-off  neiin ranvulhtute tan Insurance chungchang zirhona neih nghal a ni. 

Serchhip District-ah ASF avanga harsatna a thlen lohna turin Vawk leh a sa lakluh chungchang ah khapna thupek tihchhuah leh a ni.

Doordarshan Kendra Aizawl-a News Director Nampibou Marinmai IIS chuan zankhat riaka Serchhip District rawn tlawhin niminpiah khan Serchhip SP, Gavit Gogna chu a Pisa-ah a kawm a, Serchhip District-a Dan leh thupek kenkawh a nih dan te a sawipui a, hemi hnu hian Addl. DC Lalrinzuala pawh a Pisa-ah kawm bawkin District chhunga hmalakna te a sawipui bakah DD News hmalakna leh an hnathawh hrang hrangte a hrilh a ni. Hemi hnu nimin khan Serchhip leh a chhehvel hmun thenkhat a tlawh chhunzawm nghal bawk a ni.

Kum 2026-2027 atana P&E Department in Eng chhit man (Electricity tariff) a rawtna chungchangah nimin khan Public Hearing neih niin Eng chhitman tihsan rawtna a awm lo.

Thangram Indigenous People Movement leh Mizo Zirlai Pawl te'n ‘Thangram Cultural Meet-2026’ an buatsaih chu nizan hmasa khan Art & Culture Minister C. Lalsawivunga chuan khuallian niin a hmanpui.

Mizoram State Legal Services Authority (MSLSA) leh Mizoram Police tangkawp huaihawtin nimin khan Gauhati High Court Aizawl Bench Conference Hall-ah ni khat awh Cyber Crime chungchanga inzirtirna, ‘Training on Cyber Crime’ neih a ni.

Nikum chhung khan Aizawl City Traffic huam chhungah lirthei chetsualna tum 38 thlengin hemi kaihhnawihah hian thi 19 an awm.

Nimin khan Lunglei-ah District Bawrhsap Navneet Mann hovin a Pisa-ah Lunglei District-a tuialhthei (Petroleum, Oil & Lubricants - POL) leh eirawngbawlna gas (Liquefied Petroleum Gas - LPG) dinhmun leh harsatna a awm loh nana thil pawimawh hrang hrang te sawiho a ni a, he huna tarlan a nih danin tun dinhmunah ni tin mamawh nghei hlauhthawnawm eng mah awm lovin District mipuite chu chi-ai lo tur leh mahni mamawh bak chhekkhawl tum lo turin an in chah a, sumdawngte pawh thil chheprelh lo turin an in chah bawk a ni.a

National Oral Health Programme (NOHP) buatsaihin nimin khan Aizawl-a DHME Auditorium-ah ‘World Oral Health Day’ hman a ni a, thupui atan ‘A happy mouth is A happy life’ tih hman a ni. Nimin-a he hun hman hi National Health Mission (NHM)-a Mission Director Dr. R. Lalchhuanawma chuan kaihruaiin inlawmna thu a sawi hnuah Dr. F. Lalfamkima, State Nodal Officer (NOHP) chuan thu sawiin, Dr. Lalruatfeli, MDS-in powerpoint presentation hmangin Oral Health chungchang a zirtir bawk a ni.

Lunglei-a AH&Vety Deparment chuan kum 2024 chhunga Vawk pul hri, African Swine Fever (ASF) avanga an District chhunga Vawk suat 3,443 te hnenah zangnadawmna Rs. 2,14,92,775/- chu tun thla ni 6 atanga nimin thleng khan an pechhuak a, zangnadawmna hi chhiatna tuartu chhungkaw 623 te hnenah an pechhuak a. He zangnadawmna hi ASCAD (Assistance to States for Control of Animal Diseases) hnuai atang leh State Share atanga pekchhuah a ni a, a dawngtute Bank Account-ah Direct Benefit Transfer-a pek an ni.

Nimin khan Aizawl-a Zarkawt Community Hall-ah Association for Voluntary Blood Donation (AVBD) leh thisen pe thin pawl hrang hrang ten thisen pek chungchang inrawnkhawmna an nei a, he hunah hian Blood Donation Camp siam a nihin tum khata thisen pe teuh lo a, zing zawka thisen an pek theih dan turte sawiho a nih bakah rawtna te siam a ni a, Blood Bank lamin harsatna an neihte leh thisen petu pawl lam ten harsatna an neihte pawh sawiho a ni bawk. He hunah hian Central YMA leh Kohhran hrang hrang thalai pawl hruaitute leh National Service Scheme (NSS) State Cell Officer leh College hrang hranga NSS Programme Officer-te telin heng pawl hrang hrang ten thisen pek chungchanga zawhna an neih te pawh thawktu ten an chhang nghal a ni.

Serchhip District Cricket Assocaition (SEDCA) buatsaih Season Opening Tournament khelh mekah Tuikhuah Veng Cricket Club chuan Final an lut ta.