Chief Minister Chawimawina Nopui dawngtu chawimawi

Lawngtlai Bawrhsap Donny Lalruatsanga chuan kumin Chapchar Kut-a ‘Chief Minister Chawimawina Nopui’ dawngtu Lawngtlai-a cheng, Henry Lalhmingmuana nimin khan a Pisa-ah chawimawina thuziak leh pawisafai a hlan.

Nimin-a hemi puala hun hman ah hian Lawngtlai DC, Donny Lalruatsanga chuan Lawngtlai District chhungah mi rinawm, rinawmna avanga Chief Minister Chawimawina Nopui dawng thei an nei chu chhuanawm a tih thu a sawi a. Henry Lalhmingmuana rinawmna chuan Lawngtlai District mai ni lovin, Mizote chhuanawm leh mawi zawngin rampumah a than phah tih a sawi a. Lawngtlai DC Office chuan Henry Lalhmingmuana rinawmna chu a ngaihluin a chhuang takzet tih a sawi a ni.

He hunah hian Henry Lalhmingmuana pawhin DC Office-in a beisei leh rinphak loh-a chawimawina an hlan chu lawmawm a tih thu a sawi a, khami tum, a Auto Rickshaw a pawisa an theihnghilh chauh kha nilovin tumdangah pawh a passenger ten theihnghilh an neihin a theih ang angin a zawnchhuah thin thu a sawi bawk a ni.

Kum kalta 2025 June 19 zan khan Henry Lalhmingmuana hian Lawngtlai Bazar Veng atangin zan dar 9:00 velah Rakhine lam mi, sumdawng chu Hotel Husop, Assam Rifle Camp bul, Lawngtlai-III ah thlahin a passenger hian pawisa a theihnghilh tih Henry-a hian In a thlen hnua a lirthei a enfelna ah a hmu a, a tuamna Polythene awmdan atangin pawisa a ni tih hre nghalin, a neitu a zawng chhuak a, kim takin pawisa hi a pelet a. Hemi tuma pawisa theihnghilh him taka a peklet hi a vaiin Rs. 15,50,000/- a ni.