District Hospital Serchhip in NQAS leh LaQshya Certification a dawn lawmna neih a ni
District Hospital Serchhip-in Zotawna Park-a NQAS leh LaQshya Certification lawmna an buatsaih ah hian Bawrhsap Paul L. Khuma chuan District Hospital Serchhip-a thawktuten District an tihmingtha hle tih sawiin, tehna hrang hrangah mark sang tak an hmu vek thei chu chhuanawm a tih thu a sawi a. Damdawi In-a thawktuten damdawi chauh nilovin an tawngka chhuakin mi a tidam thei a ni tih an hriat reng a that thu sawiin, “Damlo an lo kal a, kan lo biak danin nasa takin thu a sawi dawn a ni, mi zawng zawng an inang vek lova, thawktute tawngkam an dawnsawn dan pawh a inang vek thei lo,” tiin an tawngka chhuak chu mi tan damna a nih rualin mi natna belhchhahtu a ni thei a ni tih vawng reng turin a chah a. Kan hnathawhna ah hian thil inthlakthleng a awm zel angin thawktute pawh inzir thar zel turin a chah a. Hmasawnna nei tura mi tinin tan lak a tul thu a sawi bawk a. Kan District-a damlo min enkawl saktute chungah lawmthu sawiin, damdawi In leh thawktute duhsakna a hlan nghal bawk.
He hunah hian District Medical Superintendent Dr. ZD. Lalmuanawma chuan inlawmna thu sawiin, Dy. CMO Dr. Lallawmkimi Chhakchhuak pawhin thu sawiin, “Certification kan dawn theihna hi kan zaa kan thawhhona a ni tih hi a chiang a ni,” tiin an thawh chhan chu mipuite an nih thu leh a hmasa berah an dah reng tur a nih thu a sawi bawk.
He hunah hian Dr. Beth VL. Nuntluangi, District Hospital Quality Manager chuan Report pein January ni 25, 2022 khan Internal Performance Agreement ziakin, June 25, 2025-ah State Certification an hmuh thu leh December 2026 khan National Quality Assurance Standard (NQAS) leh LaQshya Certified Hospital a puan an nih thu a sawi a. NQAS chu damlo enkawlna leh damdawi In inrelbawlna endikna niin LaQshya chu nau neihna hmun leh zai chhuahna hmunte hnathawh endikna a nih thu a sawi bawk.
Comments
Post a Comment
I ngaihdan i sawi hian mipui ngaihdan i tarlang a ni!