Myanmar-a dan kalha lut man mi 7 te Lengpui Airport atanga lut ni lovin an hria

National Investigation Agency (NIA)-in tunhnai a Mizoram a dan kalha lut-a Myanmar-a lut chho zui a puha an mante chu Lengpui Airport atanga lo lut an ni lo.

Police leh Subsidiary Intelligence (SIB) hotute’n Akashvani News Aizawl an hrilh danin NIA-in tunhnai a an man Ukrainian 6 leh American pakhat te chu Thlawhna hmanga Mizoram a lo lut an ni thei lo niin an sawi a. NIA hian ramdang mite hi phalna nei lova Mizoram-a lut niin an sawi a. Ramdang mi Mizorama lo lut turte chuan Ministry of Home Affairs atangin Protected Area Permit (PAP) an lak ngei ngei a ngai a. Lengpui tumhmuna ramdangmi lo lutte reng reng chu PAP an neih leh neih loh endik sakin a nei lo chu thawnlet leh tur an ni, an ti. Hetihlai hian report pakhatah chuan heng ramdang mi 7-te hi Assam atangin Vairengte-ah India mi anga insawiin engtin tin emaw an lut ni a rin a ni a. Inner Line Permit (ILP) lem hmanga lo lut an ni em tih chhui chian mek a nih thu an sawi a. Assam atanga lo lut an nih loh pawhin State thenawm atangin an lo lut em tih chhui zui mek a nih thu Police hotute chuan an sawi bawk.

NIA-in heng ramdang mite hi Mizoram lutin Myanmar a Chin State an lut chho ni a sawi chu finfiahna a la awm lo niin Mizoram Police hotute chuan an sawi a. Chin State a sipai sawrkar dotu ralthuam keng pawlte chu ralthuam hman leh drone hman dan an zirtir a, drone pawh Europe atanga tam tak tawlh lut chhovah NIA chuan an sawi bawk a. Hei pawh hi a finfiahna an la neih loh thu Police lam chuan an sawi a ni.