Mizoram-ah Tui pawimawhna inzirtirna ni ‘World Water Day’ pualin hun hman a ni

Khawvel puma tui pawimawhna inzirtirna ni ‘World Water Day’ chu nimin, March 23, 2026 khan hman niin Aizawl-ah pawh Dawrpui Multipurpose Hall-ah he ni pual hian hun hman a ni.

Public Health Engineering (PHE) Department leh Central YMA te huaihawta ‘World Water Day’ puala hun hman hi PHE Chief Engineer (Headquarters) K. Zohmingliana chuan kaihruaiin PHE Chief Engineer (Zone-I) Er. Ngentluanga’n kumin World Water Day thupui, ‘Water and Gender’ tih hmangin thu a sawi a, tui hnianghnar taka a luanna hmunah chuan intluktlanna a awm thin thu sawiin, tunlai khawvelah mipa leh hmeichhiate intluktlanna thlentu hnar pawimawh tak a nih dan hrang hrangte a sawi bawk a. Chief Engineer (Zone-II) Er. Lalropuia pawhin thu sawiin, “Mizoram in Fur laiin ruahtui hnianghnar takin (2 - 2.5m) hmu thin mah ila, Thal-ah erawh tui kang avangin kan buai leh fo thin,” tiin, tui renchem nachang leh tui dahkhawl nachang hre thar leh theuh turin mipuite a chah bawk.

He hunah hian Central YMA President R. Lalngheta pawhin kalkhawmte chu ruahtui khawl kawngah tan la thar tura chahin, Department atanga tui sem-ah innghat ringawt lo tur leh tui renchem leh khawl kawngah mahni zawnah theuh hmasawn a ngaih thu sawiin Mizoram-a kan lui tui leh tuihnate humhalh a pawimawh takzet thu a sawi a, “Ruihhlo do tluk zetin ngai pawimawh ila, tuihna ti bawrhbangtute chu tu pawh ni se, i do ngam ang u,” a ti bawk.

United Nations (UN) General Assembly 1992 chuan March ni 22 chu tui pawimawhna inzirtirna ni – World Water Day (WWD) atan a puang a. Kum 1993 atang khan khawvel hmun hrang hrangah hman tan niin Mizoram-ah chuan kum 2012 atang khan hman a ni a, remchan zawkna avangin kumin WWD chu Mizoram-ah chuan March ni 23-ah hman a ni. Hemi ni pual hian inelna hrang hrangte buatsaih thin niin, thutiam (pledge) chham rualnate neih thin a ni bawk a. UN hian kumtin thupui thlan bik a nei thin a, kumin thupui chu ‘Water and Gender’ tih niin, au hla (campaign slogan) chu - Tui hnianghnarna hmunah intluktlanna a awm thin (Where Water Flows, Equality Flows) tih a ni a. Nimin-a hun hman ah hian lui tui leh tuihnate humhalh tura thutiam chham rual niin, tuihna humhalh kawnga inelna hrang hranga ti thate hnenah lawmman sem a ni bawk a. Lawmman chi hrang hrang 6 semchhuah zingah Serchhip District chhung Buangpui khuaa cheng Lalnunpuii chuan ‘Outstanding contribution under the category “Women Demonstrating Excellence in FTK-Based Water Quality Monitoring’ chawimawina a dawng a ni.