Serchhip-ah Bawrhsap hovin Mizoram Civil Pensioners’ Association General Conference neih a ni
MCPA Serchhip District Hqrs. General Conference-ah hian Bawrhsap Paul L. Khuma chuan Pensioner te chu Pathian malsawmna dawnga pension thlenga an hna an thawk thei leh tun thleng maia damna tha an nei chu a ropui a tih thu a sawi a. An thawhrah ah an tu leh faten Vawiin kan lo hman theih phah tih a sawi a. Hun tam tak an lo paltlang tawhte leh an tawnhriatte pawh midang tan a hlu em em tih sawiin, “Khawtlang leh chhungkaw tana mi hlu an ni,” a ti a. “Kan khawtlang nuna harsatna kan tawh tam tak laimu chu kan chhungkua ah a ni a, pensionerte chu hun thawl ngah zawk an nih angin tawngtaina nen min beih sak rawh u,” tiin a sawm a ni. Pawl hlu tak MCPA-a memberte chu tangho zel tura chahin mahni a tih theih loh hi pawl ang chuan tih theih a ni mai thin tih a sawi a, hriselna tha nei a, khawtlang ti mawitu ni zel tura chahin, tuna sawrkar hnathawkte pawh tawngtai sak zel turin a sawm a ni.
Mizoram Civil Pensioners’ Association (MCPA) Serchhip District Headquarters General Conference hi an President Lalzuiliana chuan kaihruaiin MCPA General Headquarters Secretary F. Lalrinawma pawhin he hun hi rawn hmanpuiin pensioner te zingah harsatna in a tlakbuak te hnenah Endowment Fund pek thin a nih thu sawiin, Serchhip District Headquarters member mi 6 hnenah Endowment Fund Rs. 4000 theuh a hlan nghal a ni.
Nimin-a he hun hman ah hian MCPA Serchhip District Headquarters Secretary R. Lalhnuna chuan report pein an pawl chu pensioner thahnemngai ten April ni 1, 1999 an din a nih thu a sawi a. Tunah hian Serchhip District Headquarters chhungah member 1000 bawr vel awmin, Branch 10 an awm thu a sawi bawk.
Chawhnu lamah kum 2026-2028 chhunga MCPA Serchhip District Headquarters hruaitu thlanna neih nghal niin President-ah PC. Kapliana (Serchhip North); Vice President-ah Lalzuiliana (Serchhip North); Secretary-ah H. Ronghaka (Serchhip North); Asst. Secretary-ah R. Lalhnuna (Chhiahtlang); Treasurer-ah RL. Sangliani (Serchhip North) leh Fin. Secretary-ah Lalhmunsangi (Serchhip South) te thlan an ni.
Comments
Post a Comment
I ngaihdan i sawi hian mipui ngaihdan i tarlang a ni!