Thangram Cultural Meet A&C Minister in a hmanpui

Thangram Indigenous People Movement leh Mizo Zirlai Pawl te'n ‘Thangram Cultural Meet-2026’ an buatsaih chu nizan hmasa khan Art & Culture Minister C. Lalsawivunga chuan khuallian niin a hmanpui.

Ronpur (Assam)-a ‘Thangram Cultural Meet-2026’ tawp zan-ah hian Art & Culture Minister C. Lalsawivunga chuan Thangram Cultural Meet hmang tura kalkhawmte chibai bukin, Zo hnahthlak peng hrang hrangte chu kan chenna leilungin min daidang rih mahse kan unauna erawh engmahin a then hrang tur a ni lo, a ti a. Kan awmna hmun theuhah India khua leh tui tha niin, khua leh tui tha in a tih tur hrang hrangte midangte tana hnawklo tura khawsak kan tum tur a nih thu a sawi a. Cultural Meet zalen leh hlim tak, boruak muanawm tak hnuaia hman a ni chu thenawm State Assam Sawrkar chungah lawmthu a sawi bawk.

He hunah hian Adviser to Chief Minister Lalmuanpuia Punte pawhin Thangram leh a chhhehvel a chengte chu Mizoram Sawrkar chuan a lawm tih sawiin, British hun lai atangin Zofate chu hmun hran hranah thendarh kan nih thu leh insuihkhawm lehna tura ram hruaitu, tlawmngai pawl hrang hrang kaltlanga hmalakna-ah hma-sawnna hmuh a ni zel te chu ‘Pathian hian min hriatpui tlat a ni’ tih a chiang niin a sawi a, “A hunah chuan ram khatah inlungrual takin kan la khawsa ho dawn a ni,” a ti bawk.

Thangram Cultural Meet hi Assam State-a Ronpur-ah neih niin kum 2021 khan Cultural Meet hi lo neih a ni tawh a. Helai chhehvelah hian Chorei, Sakachep, Hrangkhawl, Ranglong, Molsom leh Kaipeng te an cheng a ni.

Horticulture Minister ni bawk C. Lal-sawivunga hian Zawlnuam-a Horticulture Department rama Mau sawngbawlna hmun tur pawh tlawh nghalin, buaipui ngai la awmte a theih anga ranga bawhzui a tum thu a sawi a ni.