MPCC-in AMC Inthlan-a an Candidate an puang

Mizoram Pradesh Congress Committee (MPCC) chuan Aizawl Municipal Corporation (AMC) Inthlan lo awm tur atana an Party Candidate turte nimin khan puangin an Manifesto an tlangzarh nghal bawk.
MPCC in AMC-a an Candidate tur an puanna hun Lal Thanhawla Auditorium-a neih ah hian MPCC President Lal Thanzara chuan Kohhran leh khawtlang-a in hmang mi tha tak tak ten Candidate tura an sawmna an pawm chu an lawm takzet tih sawiin, “Aizawl Municipal Corporation hi Aizawl khawpui enkawl a cheitu tur an ni a, tunah chuan Aizawl khawpui hi chei that a nihna hmuh tur a awm lo a, sum erawh an hmangral ve reng si a ni. Tunah hian Aizawl khawpui chei tha tur leh ti hmasawn lehzual turin Congress kan lo pen chhuak leh ta a ni,” a ti a. “Kan party chuan khawpui enkawl tur hian milar satliah leh hausa ringawt kan zawng lova, khawtlang hmangaihtu, Aizawl khawpui tan a thahnemngai tak a hnathawk thei tur kan zawng zawk a ni,” a ti bawk.

April 21, 2026-a AMC Inthlanna lo awm tur hi AMC Bial 19-ah neih tur niin Congress Party Candidate 19 zinga 9 te chu hmeichhia an ni a. An Candidate turte hi Ward No. I-ah Laldinpuii, Durtlang; Ward No. II-ah Lalrindiki Chawngthu, Chaltlang; Ward No. III-ah Lalremruata Renthlei, Ramhlun North; Ward No. IV-ah R. Lallianzuali, Ramhlun South; Ward No. V-ah Vansangkimin, Electric Veng; Ward No. VI-ah David Vanlalpeka, Chanmari West; Ward No. VII-ah Lalthanpuia Khawlhring, Zemabawk North; Ward No. VIII-ah K. Lalfakzuala, Armed Veng; Ward No. IX-ah Lalawmpuii Pachuau , Chhinga Veng; Ward No. X-ah V. Thangzawna, Zotlang; Ward No. XI-ah Zohmingthangi, Sakawrtuichhun; Ward No. XII-ah Lalkhawmthangi, Tuikual South; Ward No. XIII-ah Aldrin Zosangliana, Dawrpui Vengthar; Ward No. XIV-ah Vanlalvena, Mission Veng; Ward No. XV-ah Zodingpuii, Bungkawn; Ward No. XVI-ah R. Vanlaltluanga Bethlehem; Ward No. XVII-ah Lianhmingthangi Venghlui; Ward XVII-ah Lalhmingliana Colney, Tuikhuahtlang leh Ward XIX-ah Dr. Lalmalsawma Nghaka, Kulikawn te an ni.

Tun tuma AMC Inthlanpui lo awm turah hian Ward No. II (Chaltlang, Chaltlang Lily Veng, Bawngkawn, Bawngkawn South, Bawngkawn West); Ward No. IV (Ramhlun South, Ramthar North, Ramthar Veng, Aizawl Venglai); Ward No. V (Electric Veng, Chanmari, Zarkawt); Ward No. XI (Luangmual, Chawlhhmun, Tanhril, Sakawrtuichhun, Rangvamual, Phunchawng, Tuivamit); Ward No. XII (Tuikual North, Tuikual South, Dinthar) leh Ward No. XVII (Venghlui, Republic, Upper Republic, Republic Vengthlang) te chu Hmeichhia te tana Seat hauh a ni a, Hei hi nikum lam khan puanzar a lo ni tawh a ni.