Lengpui Airport cheithat hna thawh mek niin PCN 38 ni mek chu 55-ah tihsan tum a ni
Aviation Department-a thawktute sawi danin tun dinhmunah Lengpui Airport tlankawng (runway) chei that hna hi 64% zawh a ni tawh a, ruah sur leh thildang ten a ti buai a nih loh chuan April 2026 chawlhkar hnihna velah zawh tum a ni a. Lengpui tum hmun tlan kawng cheithat hna hi Brahma Company, Rajasthan ten an thawk mek a, Mizoram PWD ten an vilpui bawk a, Airport runway siamna atan hian Meghalaya atangin Lung chang tha bik lakluh a ni. Thudawn danin Lengpui Airport-a thlawhna tlan kawng hi a that tawk loh avangin Central Road Research Institute chuan siamthat nise tiin rawtna a thlen a, hemi bawhzui hian Mizoram sawrkar chuan Lengpui Airport thlawhna tlan kawng siamthatna tur a ruahman a. Lengpui thlawhna tlan kawng hi a that zawng tehna Pavement Classification Number (PCN) hi 38 a ni mek a, hei hi PCN 55-ah tihsan tum a ni.
Pavement Classification Number a that tawk loh vang hian thlawhna lian pawhin a phurh tawk aia tlem a phur thin a, Airbus ten passenger 180 an phurh theih laiin Lengpui thlawhna tum hmunah hi chuan a phurh theih zat aia tlem (10%) a phurh a ngai thin a. Passenger 180 phur thei pawh 165 chauh te an phur thin nia thudawn a ni a. Tun dinhmunah Lengpui tumhmunah hian Indigo leh Alliance Air te an service mek a ni.
Lengpui Airport hi kum 1998 khan Mizoram sawrkar PWD siam a ni a, a tlan kawng chak zawng hi 38 PCN (Pavement Classification Number) chauh a ni a, re-surfacing-te tih tawh thin ni mah se Aviation lama thuneitu sang DGCA chuan duhthu a sam loh thu an lo sawi tawh thin a. Mizoram sawrkar chuan eng tiang taka thawmthat ngai nge a nih hre tur leh zirchiang turin CRRI (Central Roads Research Institute) ruaiin, tunah hian thlawhtheihna lian chi pawh tum theihna tur, 50 PCN tal ni turin re-surfacing hna hi thawh mek a ni a. Re-surfacing hna thawh nan hian SASCI atangin cheng vbc. 91 a ruahman a, a thawktu atan Airport lama tawn hriat nei tha, Brahma Infra, Rajasthan rawih an niin anni hian nikum April, 2025 atang khan hmanraw mamawh te chhekkhawmin hma an la tan a. November ni 1, 2025 khan trial run neiin November ni 10, 2026 atang khan re-surfacing hna hi an thawk tan ta a ni.
Runway Bitumen layer awmsa, CRRI ten 130 mm tal laih chhuah vek tur an tih chu tha lehzual turin tunah hian Germany siam Milling Machine hmangin 150mm laihchhuah a ni a, layer hmasa berah Dense Bituminous Macadam (DBM) 65mm a chhah Bituminous Course phah a ni a, DBM layer khatna phah zawh a nih hnuah a chungah Glass Grid leh SAMI layer phah a ni leh anga, chumi chungah chuan DBM layer hnihna 65mm a chhah phah leh tur niin a chung berah BC 40mm a chhah phah a ni leh bawk dawn a, a layer pumpui chhah zawng hi 170mm a ni dawn a ni.
Comments
Post a Comment
I ngaihdan i sawi hian mipui ngaihdan i tarlang a ni!