Thenzawl CC te an Champion ta
Serchhip District Cricket Association (SEDCA) buatsaih Season Opening Tournament hi kar kalta khan Serchhip Sports Complex-ah khelh niin Inrinni khan Final khelh a ni a, Toss-a chak Tuikhuah Veng CC in vawm hmasak thlangin Thenzawl CC hian Overs 20 chhungin run 177 siamin Wicket 9 an hloh a, H. Rodingliana chuan run 72 siamin ZC. Lalremruata chuan run 36 a siam bakah Jacob Lalrinawma chuan run 27 a siam bawk a, Tuikhuah Veng CC atangin Hmingthanpuia chuan Wicket 3 lain Malsawmkima leh Lalramthianga ten Wicket 2 ve ve lain C. Zoramthara leh Samuel Vanlalawmpuia ten Wicket khat ve ve an la a ni.
Tuikhuah Veng CC vuak hunah beisei angin an vaw thei lo thung a, run 10 an siamin Wicket an hloh nghal a, Overs 18.5 ah Wicket hloh vekin run 107 chauh an tlin thei a, run 70 laiin Thenzawl CC hi an chak ta a ni. Tuikhuah Veng CC tana run siam tam ber PC Vanlalremruatpuia chuan run 36 siamin C. Zoramthara chuan run 35 a siam bawk a, anni bakah hian run 10 siam tling thei mi pakhat chauh a awm a. Thenzawl CC tan Lalrinkima leh Kamal Uddin te chuan Wicket 3 ve ve lain T. Malsawmzuala chuan Wicket 2 a la bawk a ni. Thenzawl CC player Lalrinkima hi Player of the Match a ni bawk.
SEDCA Season Opening Tournament-a Champion Thenzawl CC te hian lawmman ah Rs. 25,000 leh Trophy dawngin pahnihna Tuikhuah Veng hian Rs. 10,000 leh Trophy an dawng a, Tuikhuah Veng CC player Hmingthanpuia chu Best Batsman atan thlan a nih bakah Player of the Tournament atan thlan a ni bawk a, Thenzawl CC player T. Malsawmzuala chu Best Bowler atan thlan a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!