Chinghnia kahhlum nia sawi chhui zui a ni

Champhai Divisional Forest Officer (DFO) Lalbiakchama Chawngthu chuan tunhnaia Zawlsei khuaa Chinghnia paruk kahhlum anga Social Media-a thu thang chu chhui a nih thu a sawi.

Tunhnai ah East Tuipui Bial-a Zawlsei khuain kumin 2026 atana an thlawhhma tur an hal ni, March ni 5 khan Chinghnia 8 chu Loneitu ten Lo halna, Vahchap kang atanga tlanchhia te chu chang chhuakin silai hmangin an lo kap a, Chinghnia an lo kahte zinga 6 te chuan Silai mu tawng fuhin an thi niin Social Media ah puanzar a ni a. He thil hi nungcha humhalh lai, Dan lova tihhlumna thil a nih avang leh Dan bawhchhiatna thil a thleng nia a lan avangin Champhai DFO Lalbiakchama Chawngthu chuan thil awmdan a hriat veleh bawhzui nghalin thil diklo titute manchhuak a, hrem an nih theihna turin hma a la nghal tih a sawi a ni.

Champhai DFO Lalbiakchama chuan he thil enfiah tur leh a tul anga hma la zui turin Khawbung Forest Range Officer chu Zawlsei khuaah a tir nghal a. Zawlsei khuaa khawtlang hruaitute thil kalphung a zawtfiah a. Zawlsei khua ah Bawng emaw, Sial emaw, a huhova vulhtu an awm loh thu leh an thlawhhma hal avanga Chinghnia kahhlum a nih thu an hriat ve loh thu Zawlsei khawtlang hruaitute chuan an lo hrilh a. March ni 15, 2026 khan Champhai DFO chuan Zawlsei khua hi tlawhin thil awmdan a hmunah kalchilhin a enfiah tawh a, tun thlengin Chinghnia te kahhlum an nih leh nih loh hriatfiah a la ni rih lo a ni.