Sawrkar kumthar ah Eng chhitman tihsan tumna a awm lo

Kum 2026-2027 atana P&E Department in Eng chhit man (Electricity tariff) a rawtna chungchangah nimin khan Public Hearing neih niin Eng chhitman tihsan rawtna a awm lo.

Nimin khan Power & Electricity Department-in kum 2026-27 atana Eng chhit man (Electricity tariff) a rawtna chungchangah Mizoram Electricity Regulatory Commission (MZERC) chuan Aijal Club-ah Public Hearing neiin MZERC Chairperson, Benjamin L.Tlumtea chuan a kaihruai a. Hun bituk chhunga mipuite'n rawtna leh sawiselna thu an thlente leh P&E Department-in an chhannate ngaihthlak a ni a. Kum kal mek 2025-2026 leh kum hmasa 2024-25-ah te khan Eng chhitman hi tihsan a lo ni tawh lova, tuna P&E Department-in rawtna a thehluhah pawh hian Eng chhitman tihsan rawtna a awm lova, mipui atanga Revenue sum mamawh zat (ARR) a hmuh tlin lohna chu Sawrkarin subsidy-in a pek sak dawn a. MZERC chuan ngun taka a zirchian hnuah kumthar FY 2026-27 atana Sawrkar pek tur subsidy leh Eng chhitman tur zat hi a bithliah dawn a ni.

Multi-Year Tariff Regulations, 2014-in a phut angin P&E Department hian kum tinin mipui hnena Power Supply enkawl nana sum leh pai a mamawh (Aggregate Revenue Requirement) leh Eng chhitman bithliah chungchanga rawtna a neihte chu Commission hnenah a thehlut thin a. A rawtna hi newspaper-ah chhuahin mipui vantlang (consumers leh stakeholders) tan sawiselna hun emaw, thurawn pekna hun emaw hawn thin a ni a. Sawiselna emaw, thurawn emaw pe duhte chuan MZERC hnenah ziakin (Affidavit hmangin) an thehlut thin a ni.