AMC Inthlan-a ZPM Candidate turte puan an ni

Aizawl Municipal Corporation (AMC) Inthlanpui lo awm tura ZPM Party Candidate te chu nimin khan puangin AMC Election Manifesto pawh tlangzarh nghal a ni.
Aizawl Vanapa Hall-a ZPM Candidate tur puanna hunah hian ZPM hruaitu Lalduhoma chuan, “Kum hnih chhung leka he rama Kalphung thar mipui sawrkar hnathawh a ropui a, Aizawl khawpui hmasawnna tura kan thawh mek leh ruahmanna te hi tipuitling turin ZPM kaihhruai AMC kan mamawh,” a ti a. Aizawl khawpui tana an hmalakna hrang hrangte tarlangin, Aizawl khawpui hmasawnna tur leh din thar lehna tura mipuiten ZPM siam AMC thar thlang turin mipuite a chah bawk a ni.

ZPM Adviser K. Sapdanga pawhin kum hnih chhung lekin thil ropui tak a la tih hman loh tih sawiin, “Heti chung hian kum tam tak lo sawrkar tawhten an thiltih leh tuna kan tih chin an khaikhin chiam fo hi a lawmawm ah ka ngai. Kawng tam takah Zoram hmel thar kan hmu mawlh mawlh a, thalaiten min beisei san zia kan hriat hian kan phur takzet a ni. Mipuite hian kalphung hluia lut leh turin he ram hi an duh lovang tih ka chiang a ni,” a ti a. “Kalphung hlui ni lo, kalphung thar kan zawrh hi Mizorama sawrkar mek nen lungrual taka thawh a nih theih nan mipuiten thlantlin tur kan hriat a pawimawh takzet a ni. Ram rorelna ah Pathian ram tundin kan tih ang bawkin Municipal-ah pawh Pathian ram lo thleng rawh se,” tiin ZPM President Lalliansawta chuan AMC Inthlan-a an Party Candidate turte hi a puang a ni.

ZPM Party hian AMC Inthlanpui lo awm turah hian Ward 19 an chuh vek dawn a, an Candidate tura an puan mi 19 zinga 8 te chu Hmeichhia niin AMC Term liamtaa Corporator ni zingah mi 4 an ding nawn leh dawn a, tun tuma an Candidate turte hi Ward No. I-ah Vanlalhriata, Durtlang; Ward No. II-ah R.Lalmawipuii, Chaltlang; Ward No. III-ah Vanlalfaka, Ramhlun North; Ward No. IV-ah Vanlalhriatrengi, Ramthar; Ward No. V-ah Dr. Lallawmkimi Tochhawng, Electric Veng; Ward No. VI-ah H. Lalremtluanga, Chanmari West; Ward No. VII-ah Zochhuana, Zemabawk Kawn Veng; Ward No. VIII- Christina Roluahpuii Sailo, Armed Veng South; Ward No. IX-ah Zoramchhana, Chhinga Veng; Ward No. X-ah PB. Lallawmzuala, Zotlang; Ward No. XI-ah Helen Rualchhingi, Luangmual; Ward No. XII-ah C. Vanlalhruaii, Tuikual North; Ward No. XIII-ah Vanlalhruaia, Dawrpui Vengthar South, Ward No. XIV-ah Roy Lalhriatpuia, Khatla Bungkawn; Ward No. XV-ah VL. Zamlova, Bungkawn; Ward No. XVI-ah R.Lalawmpuii, Bethlehem Vengthlang; Ward No. XVII-ah Lalremruati Sailo, Republic Veng; Ward XVII-ah K. Lalrodinga, Salem Veng leh Ward XIX-ah Dr C.Malsawmtluangi, Hlimen te an ni.