MUHCS 2.0 ah Pensioner te ruahmanna ti danglam

Sawrkar hnathawk pension zinga Mizoram Universal Health Care Scheme (MUHCS) 2.0 zawmte’n an kawppuite inenkawlna bak an bill thei tawh dawn lo.
Finance Department thuchhuah tarlan danin, MUHCS 2.0-ah pensioner scheme hian chhungkaw member zawng zawng huam tawh lovin pensioner leh an kawppuite chauh a huam tawh dawn a. An chhungkaw member dangte chu mipui nawlpui (General Beneficiary Category) hnuaiah an inziahluh ve a ngai tawh dawn a. Nupa a Mizoram Sawrkar hnuaia Pensioner ve ve chuan an pahnihin a hrana MUHCS 2.0 hi an zawm a ngai tawh dawn a ni.

MUHCS 2.0-ah hian pensioner-te chuan an duhthlanna hmangin MUHCS hi an zawmin an zawm lo thei a, a zawm duh chuan thla tin subscription fee Rs. 1,000 pein an zawm thei a, MUHCS zawmte chuan kum khat chhungin damlo in enkawlna atan cheng nuai 12 thleng an Bill thei a, Private Ward-ah an awm thei dawn bawk a ni. Pensioner ten MUHCS 2.0 an zawm duh lo a nih erawh chuan CCS (P) Rules, 1972 in a phal angin Medical Allowance an hmuh thin chu an dawng chhunzawm anga, amaherawhchu, MUHCS 2.0 hnuaia hamthatna erawh an dawng ve thei dawn lo a ni. He ruahmanna hi tha thar April ni 1, 2026 atanga hman tan tur a ni.