AMC-ah hmeichhia vote tam

Aizawl Municipal Corporation (AMC) inthlanna neih turah mipa aiin hmeichhe vote nei an tam zawk a, Ward No. 18 chu Voter tamna ber Ward a ni.

AMC inthlanna neih tur atana hman tur Electoral Roll chu kumin January ni 7 khan tlangzarh a ni a, hetah hian vote nei mi 2,37,846 awmah mipa vote nei 1,09,376 leh hmeichhia 1,28, 470 an awm a, Vote nei zingah mipa 19,094 in an tam zawk a ni. AMC-a Ward 19 awm zingah Ward No. 18-na chu voter tamna ber Ward niin Voter 18,906 an awm a, Voter tlemna ber Ward chu Ward No. 8-na niin voter 7,975 an awm thung a ni.

SEC ruahman dan chuan thla thar April 21-a AMC inthlanpui neih turah hian Vote thlaktu ten him leh awlsam, hun khawhral lo leh rang taka vote an thlak theih nan Polling Station 257 ruahman a ni a. A tul dan zel in Auxiliary Polling Station siam belh turin an ruahman a ni a. State Election Commission chuan Mizoram Municipalities (Election of Councillors) Rules, 2007-in a sawi angin, Aizawl Municipal Corporation inthlan senso atan Candidate pakhatin Ward pakhat ah cheng nuai khat thleng an hmang thei dawn a ni.

AMC inthlan lo awm turah hian sum hman dan chungchang vil tur leh buaipui tur Expenditure Observer atan Malsawmdawngliani, Director Local Fund Audit & Pension chu ruat a ni a, Expenditure Observer bakah AMC Corporation inthlan atan vek hian State Level Nodal Officer, Expenditure Monitoring hna hmui tel tura tih a ni bawk a. Mizoram State Election Commission thuchhuakah hian Expenditure Observer kaihhruaina hnuaiah Expenditure Monitoring Team te chuan Candidate tinte inthlan senso reng reng uluk takin an vil dawn a ni. Tun tuma AMC Inthlanna neih turah hian Returning Officer pali ruat an ni a, anni bakah hian General Observer pali leh Model Code of Conduct Nodal Officer pakhat ruat a ni bawk.