Aizawl-ah ‘Training on Cyber Crime’ neih a ni

Mizoram State Legal Services Authority (MSLSA) leh Mizoram Police tangkawp huaihawtin nimin khan Gauhati High Court Aizawl Bench Conference Hall-ah ni khat awh Cyber Crime chungchanga inzirtirna, ‘Training on Cyber Crime’ neih a ni.

Nimin-a ‘Training on Cyber Crime’ hawnna hunah hian Gauhati High Court Judge, Justice Michael Zothankhuma chuan hmanpuiin Cyber Crime chungchang zirtirna tha tak buatsaih a ni chu lawmawm a tih thu sawiin, “Tunlai khawvelah technology hi a inthlak danglam chak hle a, dan leh hrai siam chhung erawh a rei thin avangin sualna leh inbumna thar chi hrang hrang lo piang leh a venna tur leh hremna tur dan inkarah kar awl a awm thin,” a ti a. He kar awl hnawhkhat tur leh Cyber Crime chak taka do tur chuan Dan kengkawhtute, Police leh Judiciary-te an tanho a ngai tih sawiin, Judiciary-in Cyber Crime lam chhuina leh hremna tura Digital Evidence leh kawng dang hrang hranga hma an lo lak tawhte kalkhawmte hnenah hian a tarlang a, Cyber Crime laka invenhimna hmasa ber leh pawimawh ber chu mipui zirtirna (Public awareness) a nih thu a sawi bawk.

He hunah hian Assam State Legal Services Authority-a Executive Chairman, Justice Nelson Sailo pawhin kum 2017 khan Supreme Court chuan ‘Right to Privacy’ chu India ram Danpui hnuaia Article 21 hnuaiah Fundamental Rights zinga pawm a lo nih tak thu leh he thutlukna zulzuiin Parliament pawhin kum 2023 khan mitinte anmahni data venhimna chanvo (right) humhalh saktu, Digital Personal and Data Protection Act (DPDP Act) 2023 chu a pass tawh thu a sawi a. India ramah Cyber Crime a pung chho nasa tih sawiin, kum 2023 khan case 86,000 chuang file a ni a, Mizoram-ah pawh kum 2022-2026 chhungin Cyber Crime case 361 a awm a, kumin bikah March thla thleng khan case 5 file a nih tawh thu a tarlang bawk a. Heng case zingah hian Financial fraud, Social Media impersonation leh Sexual harrasment case-te a tam zual thu sawiin. Cyber Crime laka inveng turin mipuite chu Antivirus software hman te, file hriatloh hawn emaw, download mai loh te leh Police Station-ah a rang thei ang bera report vat a tul thu te a sawi bawk.

Nimin-a he Training-ah hian Mizoram Director General of Police (DGP) Sharad Agarwal chuan Cyber Crime nasa taka a pun avangin dan kengkawhtute tan a lu hai thlak thu a sawi a. Tunlai thiamna Artificial Intelligence (AI) hmangin thlalak (phishing) leh video lem (deepfake) a darh nasa a, AI chu password pawimawh ruk chhuah nante leh virus thehdarh nan hman thin a nih thu a sawi a. Cyber crime laka inven nan Mizoram Police chuan Technical Support Cell a din tawh thu leh data him leh him loh endik nan digital forensic tool-te pawh an hman tangkai tawh thu te a sawi bawk a ni.