Mipui hnena kawlphetha pekna atana mamawh vbc. 761.15 atangin Sawrkarin vbc. 175 a tumsak dawn

Power & Electricity Department in kum 2026-2027 chhunga mipui hnena kawlphetha pekchhuahna atana sum leh pai a mamawh (Aggregate Revenue Requirement) chu cheng vbc. 761.15 nia chhut a ni a. Eng chhit man tihsan a nih dawn loh avangin sawrkarin sum indaihlohna phuhruk nana a tumsak (subsidy) tur chu cheng vbc. 175 a ni.
Zirtawpni khan Aijal Club-ah Power & Electricity Department-in kum 2026-2027 atana Eng chhitman a rawtna chungchangah Mizoram Electricity Regulatory Commission (MZERC) chuan Public Hearing a nei a. Hemi huna P&E Department thawktute tarlan danin kum thar 2026-2027 chhung hian power Million Units 839.04 tharchhuak tura beisei a ni a, heng zinga 553.14Million Units chu Mizoram chhunga hman tura ruahman a niin State pawna hralh turin 285.90 Million Units ruahman a ni a. Kum tharah hian Distribution loss 24.50% awm tura ngaih a ni bawk.

Power & Electricity Department thawktute sawi danin kum thar 2026-2027-ah hian power hralhna atangin cheng vbc. 586.15 hmuh let beisei a ni a, hengte hi Mizoram chhung atangin cheng vbc. 454.30 leh State pawna hralhna atangin cjheng vbc. 131.86 a ni a. Kum thara sum mamawh zawng zawng cheng vbc. 761.15 atangin sum indaih lohna cheng vbc. 175 chu sawrkarin a tum sak dawn a ni.

Mizoram Electricity Regulatory Commission (MZERC) in Public Hearing an neihnaah hian mi pahnih, Mizoram Consumers Union President Thanglura leh Vanlalruata, Tuikual South te hnen attangin affidavit hmangin zawhna engemaw zat a lut a, hengte hi P&E Department thawktute chuan an sawifiah a. Public hearing-ah hian Power & Electricity Department chuan an hmalak tum dan leh sum mamawhte an sawifiah a, hengte hi MZERC chuan enfiahin March ni 30, 2026 hmain thutlukna a siam dawn a ni.

He huna tarlan a nih danin kum 2024-2025 atangin Mizoram-a Power hman man tihsan a la ni lo a, a hma chuan kum tin tihsan thin niin kumthar atangin Pre-paid Consumer siam tum a ni a, 2% rebate pek tum a ni. Pre-paid hi Rs. 100 aia tlawm lovin recharge hmasak tur a ni a, a hnuah Rs. 50 aia tlem lovin recharge zel theih a ni anga. Ni 7 hun a la awmah Consumer te hnenah message hmangin recharge a hun tawh thu hriattir an ni ang a, balance a zawh atanga ni 3 chhunga recharge a nih loh chuan an power tihtawp sak an ni ang.

Pre-paid Meter hi a thlawna vuah tur a ni a, a hawh man (rent) erawh chawi a ngai thung a. Consumer in meter a tihchhiat chuan a chawi ang a, engemaw thildang vanga a chhia anih chuan a thlawna thlak sak a ni ang. Pre-paid Meter hi hmarchhak Bial-ah chuan pakhat Rs. 10,000 man vel nia chhut a ni a. Smart meter vuah hna hi Advanced Metering Infrastructure Service Provider ten an thawk a, Smart meter vuah mek hi February 2027-ah chuan zawh vek tum a ni.

Public Hearing-a thil langsar thenkhat te :

* Kum thara P&E Department sum mamawh tarlante hi Mizoram Electricity Regulatory Commission (MZERC) chuan an zirchiang anga, March 2026 chhungin ruahmanna a siam fel ang.

* Mizoram-a power hloh (distribution loss) a tam chhan chu khawl lam chiangkuan loh vang leh power pawt ru an tam vang a ni.

* Sawrkar kum kal mek (2025-2026) hian power hralhna atangin hlep (surplus) cheng vbc. 41.62 neih theih beisei a ni.

* Mizoram Power & Electricity Department hnuaiah (September 2025) thawktu 3280 an awm mek a, kum hmasa lam aiin 51 in an tam.

* Kum tharah petrol pump hmun 19-ah Electronic Vehicle Charging point dah tum a ni.