Mizoram chu remna leh muanna awmna hmun a ni chhunzawm zel tih Larsap in a sawi

Mizoram Larsap Gen. Vijay Kumar Singh chuan ram hruaitu thiam tak te kaihhruaina hnuaiah Mizoram chu remna leh muanna awmna hmun a ni chhunzawm zel tih sawiin, Mizoram Legislative Assembly rorelna kalphung zahawm tak vawnhim kawnga sulhnu duhawm tak neih tawh thin chu chhawmnung zel turin assembly Member te a sawm bawk.
March 16, 2026 thleng awh tura ruahman Mizoram Legislative Assembly 9-na, thutkhawm vawi 6-na leh Budget Session ni bawk chu nimin khan Aizawl-a Assembly House-ah neih tan niin he hunah hian Larsap chuan sawrkar hmalakna hrang hrangte a tarlang a. Mizoram chuan remna leh muanna a chhawmnung zel tih larsap chuan sawiin, “Sum leh pai dehchhuah kawngah pawh hma sawnin hmasawnna rahbi a zawh mek zel a ni,” a ti a. Langtlang leh mawhphurhna la ngam din turin Sawrkarin theihtawp a chhuah tih sawiin, Agriculture leh a kaihhnawih, hmasawnna ruhrel din leh thil siamna (Industry) hlawk tur din kawngah Sawrkarin hma a la zel tih a sawi a. Kutthemthiamna, entrepreneurship leh infiammna hmanga thalaite thuam chak leh intodelha siam chu Sawrkar ngaihpawimawh zinga mi a nih thu sawiin, Mizoram Legislative Assembly rorelna kalphung zahawm tak vawnhim kawnga sulhnu duhawm tak neih tawh thin chu chhawmnung zel turin member-te a sawm a ni.

Ram hruaitu thiam tak te kaihhruaina hnuaiah Mizoram chu remna leh muanna awmna hmun a ni chhunzawm zel tih Larsap chuan sawiin, harsatna tam tak karah ei leh bar zawnna kawngah huapzo takin hmasawnna hmuh zel a ni chu lawmawm a tih thu a sawi a, hmathlir fiah tak leh theihtawp chhuahna chuan engtikah emaw chuan Mizoram chu remna leh hmasawnna State entawntlak takah a la siam ngei a beisei thu leh mi naran ten an suangtuahna a tak rama an chantir theih tih lantirtu a nih ngei a beisei thu a sawi a ni. 

Larsap chuan a kaihhruai sawrkar inrelbawlna chuan kawng tinrengah hna thawk tha, langtlang leh mawhphurhna la ngam ni turin theihtawp an chhuah tih pawh sawiin, a sawrkar tum ber chu Lo lama eizawnna, hmasawnna ruhrel din leh kawng hrang hrang hmangin mahni a innghat State siam a ni tih a sawi a, Mau leh tualchhunga hmanraw awm te hman tangkai a tum a nih thu te, Mizoram thalaite tana kutkawih eizawnna programme leh infiamna bakah an thiamna tih hmasawn sak te chu an ngaihpawimawh zual zingah a tel thu a sawi a ni.

District tina khaw pakhat talah 'Digital Crop Survey' kalpui tura tih chu tha taka bawhzui anih avangin Mizoram chuan cheng vbc. 60 a dawng dawn tih Larsap chuan sawiin, “Kum 2025-26 chhung hian Oil Palm chingtute'n MT 5599 tharin, cheng nuai 792.45 an la lut a. Bana Kaih kaltlangin Mausen-ah 'Banana Fibre Extraction Unit' siam mek a ni a. Augmentation of Muga Culture Project hnuaia hamthatna dawngtu mi 565 te training pek an ni tawh bawk a. Thenzawl-ah nikhata Artui 70,000 thar chhuah theihna tur Mega Egg Production Farm siam mek niin, 2025-26 chhungin Sangha Dil hectare 33.58 a zau leh Sangha no khawina hectare 50.043 a zau siam a ni,” a ti.

Dan leh thupek kenkawh kawngah harsatna liantham a thlen loh thu pawh Larsap chuan sawiin, ruihhlo cheng vbc. 1,047 chuang hu man niin Mizoram Liquor (Prohibition) Act, 2019 siam thatna leh Dan thar hnuaiah nikum December thla thleng khan thubuai 4,915 ziahluh niin, mi 4,532 man an ni a. April- December 2025 chhungin Lok Adalat hnuaia thubuai lut 9,223 zinga 1,769 te chinfel niin, cheng vbc. 47.86 hu inkhinna chinfel niin Mizoram Lok Ayukta hnuaiah Inquiry Wing din a ni tawh tih a sawi a. Mizoram chu India rama ziak leh chhiar thiam kim vekna State hmasa ber atan May ni 20, 2025 khan puan a nih thu pawh Larsap chuan a sawi bawk a ni.