KRISMAS LEH ZORAM THAR

KRISMAS LEH ZORAM THAR 

- Rev. Dr. Zaichhâwna Hlâwndo

Zofâte zingah Krismas hi enge a ni tih hrelo chu kan awm tawh kher lovang. Chutih rual chuan he Krismas kum za chuang kan lo lawm tawh leh Zoram Thar inzawmna chu kan la hre kher lovang. Zoram Thar han tih hian mi tam tak phei chuan Kohhran rindân pâwn lam deuh emaw, thil a taka thleng thei pawh nilo, tute mumang mai mai emaw tite pawh kan awm ang. Bible ah hian Zoram Thar lo thleng tur chanchin hi a in ziak a ni tih hrelo phei chu a tam zawk kan ni ang. Zoram Thar leh Krismas inlaichin dan hi tumahin an sawi emaw ziah pawh a la awm kher lovang. Krismas leh Zoram Thar inzawm dan hi thupui pathum- (1) Lal Thuthlung thar (2) Hnam Thuthlung thar leh (3) Ram Thuthlung thar awmzia sawiin kan ziak ang. Zoram Thar awmzia hi la hre fiahlo te kan awm takin han sawi hmasa ila. (1) Zoram Thar chu Pathian Lal ram sawrkar lo piang tur a ni. (2) Zofate nunah Pathian lal ram a takin a lo thleng ang. (3) Zofate hnam ah kan harh ang a, hnam khatah kan insuihkhawm vek ang. (4) Chu hnam khat leh thlah khat Zofate chenna ram hming hi Zoram tih a ni tawh ang. A thar hlak tur a nih dawn avangin ZORAM THAR (New Zoland) tih a ni ang . 

(1) Krismas chu leia Pathian lal ram tundinna a ni : Isaia 9:6 ah chuan 'Kan tân naupang a lo piang a, fapa pêkin kan awm ta a; rorêlna chu a kokiah a chuang ang’ tih kan hmu a. Krismas chu Pathian in Setana’n ata nilo a lo hauh leh awpbeh chhuhlet leh tura Pathian fapa lo kalna ni. Khawvel hi Setana sawrkârna tih mai tur a ni. Khawvel puma sawrkâr dingte pawh hi Isua Krista lalna sawrkâr nilovin, mihringte hmanga Setana lalna sawrkâr a ni. Krismas chu Pathian leh mihring inkara thuthlung kehchheh tawh din thar lehna, Pathian lal ram thuthlung thar kawng hawnna a ni. Lal Isua Krista’n leia a tih tur a tih zawh vek a vana a lawn dawn khan lei leh vana thuneihna zawng zawng a kutah a awm leh tawh thu a sawi (Matthaia 28:16). Chu a lal ram din a, vana miten a duh zawng an tihna tura Pathian lal ram a lo thlen a, Sawrkârna chu a kokiah a chuan hun tur chu Zoram Thar lo pian hun tur chu a ni. Mihringte lal leh thuneih inchuhna bawlhhlawh tak hi ama lalna in a rawn thlak tawh ang. Zofate thinglungah Krismas tak tak Krista lalna chu a thleng ang. Chu sawrkâr chu party sawrkâr ni tawh lovin, Pathian Lal Ram Sawrkar (PLRS) zawlnei Isaia lo sawi lawk ang kha a lo piang ang. Democracy ni tawh lovin Theocracy Pathian thu ang leh Pathian duh anga Pathianin a mite tana sawrkârna a rawn din ang. 

(2) Krismas chu Pathianin a hnam thlan Israel te a tundin lehna a ni : Krismas chu Zawlnei Hosea bu-a Israel hnam a mah phatsantute a kalsan ‘Jezreel’ tawh, a khawngaih tawhloh ‘Lo-ruhama- Khawngaihhlawhtawhlovi, Lo-Amia-Aminitawhlo te a rawn zawn lehna hnam thuhtlung thar tundinna a ni. Pathian an kalsan avanga Pathian pawhin a kalsan Israel hnam berambo te a rawn zawn lehna a ni. Pathianin khawvel chhandam turin Israel hnamah sa a rawn phun a, Mari, a pa Juda leh a nu Levi hnam a mi leh a pa Zosefa pawh Juda hnam a mi a ni. Matthaia 15:24 ah chuan ‘Israel hnam berambo te hnenah chauh lo chuan tirh ka nilo’ tiin a sawi a. Hei hi Israel thar a rawn tundin lehna tur a ni tih tichiangtu chu a ni. Israel hnam kaltlangin khawvel hnam tinte tan a fa ni leh theihna hnam thluthlung chu a rawn hawng leh ta a ni. Zofate zingah hnama chiang, Israelna a chiang inti Isua Krista kaltlang lo, Kalvari DNA tello leh amah tel mang lovin Israelna buaipuite kan awm ang tih pawh hlauhawm tak a ni. Zoram Thar chu Zofâte a hnam nihna pawh hre tawh lo a lo darh vek tawhte hnama harh lehna a ni. Pathian hnam thlan Zosefa tu leh fate -bo chikima bo te haw chikima kan haw khawm lehna tur a ni. Lal Isua pawhin a ngaihpawimawh avangin a hnam thlan Israel fate awmna hlui Samari rama Jentailte awmna a lut lova, khawvel hmun hrang hrang an darhna hmuna zawng chhuak leh turin Zirtir 12 te pawh kha a tirchhuak a ni (Matthaia 10: 5-6). Keini pawh kum 1894-ah Missionary te hmangin min rawn zawng chhuak leh ta a ni. Hnam nihna pawh hre tawh lote hnama siama awm lehin Pathian tan kan ding leh tawh dawn a ni (Sam 102-17-18) 

(3) Krismas chu Lal Isua Krista lalna ram din tura Chhandamtu lo pianna a ni. Judate pawh khan Lal Isua Krista an zinga a lo kal khan Israel te tana ram a pêk leh hun tur kha an zawt a nih kha (Tirhkohte 1:6) Mihringin Pathian thuthlung kan bawhchhiat avangin Eden huan atanga hnawhchhuah kan ni a, lei chu anchhe dawng a lo ni. Chu chu Pathian thu awihloh avanga Ram thuthlung bawhchhiatna chu a ni. Pathianin Ram Thuhtlung thar din turin Abrahama chu a ko a, a thlahte chu ram tiam Kanan-ah a hruai lut. Kanan ramah chuan milem pathian biain a thuthlung an bawchhiat leh avangin ram luah reng chu a remti lova, ram dangah salah hruai bovin an awm thin. Israel hnam 10 te phei chu khawvelah a hnawt darh ta vek a ni. Mahse hun hnuhnungah an vahdarhna hmunah chuan ram a pe leh dawn a, Ram Thuthlung Thar a din leh dawn a ni tih kan hmu (Jeremia 31:10). A hnam thlan te tana a ram din tur hi Isaia ziaka kan hmuh angin ‘Tlang Thianghlim’ a ni tawh dawn a. Israel ram din thar lehna a nih dawn avangin ‘Jerusalem Thar’ din tur Bible a kan hmuh hi a ni dawn a ni.

Zoram Thar chu Pathian in a hnam thlan Israel te chenna ram a pek leh din thar Ram Thuthlung thar tur chu a ni. Kan chenna ram hi tumahin hnehchhuh a kan lak a nilo, Pathian in a hnam thlante chenna tur hmun thar hlak a lo ruat lâwk a ni. He kan chenna leilung ngeiah hian a lalna ram thar -Israel ram thar chu Pathian in din a tum a ni. Chu chu Lal Isua Krista lalna ram tiin khawvelin an hria ang. A ram chu Kristian ram a ni ang a, a hnam chengte pawh Kristian hnam ti a hriat kan ni ang. Israel hnam berambo te hnena tirh a nih angin Israel thar -Zoram Thar a lo ding ang. Zofate chu Lal Isua Krista tan kan ding tawh ang a, khawvel tana eng, hnamte tana eng leh khawvel pum tana tawngtaina inpui kan nih hun tur hi a nghahhlelhawm tak zet a ni.