Lenkawl

Tuichangral South Group YMA Conference vawi 48-na Hmunzawl khuaa neih chu nizan khan a tiak ta.

Women & Child Development, Serchhip District huaihawtin niminpiah-a ‘International Women's Day 2023’ pualin nimin khan Serchhip-ah hun hman a ni a, he hun hi Serchhip SDO (Sadar) Lalzikpuii chuan khuallian nia hmanpuiin, “Kan tu leh fa te kawng dik kawhhmuh leh zirtir hi kan tih tur a ni a, an entawn tlaka kan awm a tul a ni,” a ti.

Serchhip Police te chuan nimin khan Dan lova Kuhva rah phurh nia hriat Motor 9 atangin an man a, heng te hi Tualchhunga hralhna anga chhutin cheng nuai 16 chuang man nia chhut a ni.

Serchhip District Football Association (SDFA) chuan Serchhip District Football Championship 2023 Final Match-a buaina chungchang ah hremna a tichhuak ta.

PHE Department in Tuikum lui an lakna (Pump House) atanga Electric khawl hmanga Tui an pump-na tur khawl thar chu nimin khan Ser-chhip rawn thlenpui niin Pump House-ah dahluh nghal a ni a, Vawiin hian buaipui ngai te buaipui tanin karleh Thawhtanni atang khian khawl thar bun hna hi thawh tan theih an beisei tih PHE Department hotute chuan LENKAWL an hrilh.

Project Management Unit (PMU) Mizoram leh PHE Department, Serchhip WATSAN Division te buatsaiha tunkar Thawhtanni atanga neih Pump Operator Training chu nimin khan zawhfel a ni.

Serchhip P&E Veng Branch YMA chuan Tuikum lui an humhalh, Vanchengte kai (Darzika leilet) atanga Sipai lui chhuah (Sipai Li) inkarah nimin khan hnatlang neiin luidung humhalh a nih thu chhinchhiahna te an tar thar a. P&E Veng Branch YMA chuan an luidung humhalh chinah hian Sangha te eng hmanrua maha man phal a nih loh thu an sawi a ni.

MHIP Sub-Hqrs. Serchhip chuan State Bank of India (SBI) atangin Corporate Social Responsibility (CSR) hnuaiah Sanitary Pads 500 dawngin heng te hi an hnuaia Branch 20 te hnenah semchhuah leh tur a ni ang.

Lalpa Chhiahhlawh Intelkhawm hmalakna in nizan hmasa khan kum 2023 Mizoram Inthlanpui a Pathian Lal Ram Sawrkar tana Thuthlung Bawm zawntu tur mi 5 te puanchhuah an ni.

Khawbel leh Rullam khua inkalpawhna tur kawng laih thar chu nimin khan bialtu MLA leh Minister Er. Lalrinawma chuan a hawng.

Serchhip Mat Phai Zawlpui zau leh a chhehvel-ah kawlphetha pe turin ngawrh taka hmalak mek a ni a, harsatna dang a awm a nih loh chuan kumin-a Leilet neitu ten an Leilet-a hna bul an tan hmain kawlphetha hi pek hman an beisei thu helai hmuna hnathawktute chuan an sawi.

Nizan hmasa khan Thenzawl-a sumdawng hrang hrangte tan khualzin (Tourist) te lo dawnsawn tur leh khualzin te tana tualchhung mi te lo inbuatsaih dan tur hrang hrang inzirtirna neih a ni.

Serchhip Auto Rickshaw Owner's Association hruaituten Serchhip Darnam Tlang ah Auto Rickshaw Stand siam sak tura an dilna chu Serchhip Police Traffic hotute leh Serchhip DTO bakah SAROA hruaitute chuan an enfiah hnuah Auto Rickshaw Stand tur hi siam thar a ni a. Darnam Tlang-a Anganwadi leh District Transport Office inkar kawng thlang lam meter 8.5 huamchhung chu Serchhip Addl. SP Sai-dingliana Sailo chuan Auto Rickshaw panga (5) dinna turin Auto Rickshaw Stand atan hian puangin hman tan nghal tur a ni ang.

National Highway-54 laihzauh leh siamthat hna thawh mekah New Serchhip Kikawn Thlanmual panna kawng tihchhiat a nih avang leh hnathawktute leivung paih in Thlan thenkhat a chhilh te siamthat phutin nimin khan New Serchhip North khawtlang chuan kawngpui siam hna thawktute an dang a, inbiakna te an neih hnuah inremna siamin hnathawktute dan hi tihtawp zui a ni.

Serchhip-a Excise & Narcotics Department chuan nimin khan Serchhip khawpui chhung hmun hnih ah Heroin No. 4 Hawng 20 chuang an man.

Thenzawl khawtlang hruaitute chuan nimin khan Chief Minister Zoramthanga hnenah an khawtlang mamawh hrang hrang an thlen.

Tun thla ni 8-a International Women’s Day lo thleng tur pualin nimin khan Mizoram District khawpui hrang hrangah Cyclothon /Cycle Rally neih niin Serchhip-ah pawh Health & Wellness Centre bultumin Rally hi neih a ni. He ni-ah hian ‘Healthy Women, Healthy India’ tih chu thupui-ah hman niin Tuizemdum kawn-a he ni puala hun hman chu Dr. Lallawmkimi Chhakchhuak chuan hmanpuiin he ni hman chhan te a sawi a, hriselna atana Thirsakawr chuan a pawimawh thu te pawh a sawi bawk a ni.

Serchhip-a Excise & Narcotics Department te chuan Inrinni zan khan Serchhip leh Thenzawl inkarah Heroin No. 4 Hawng 5 zet an man.

Inrinni kalta, March 4, 2023 kha UPC Mizo-ram-a Pentecostal Youth Department (PYD) te dinchampha vawi 62-na niin hmun hrang hrangah he ni pual hian hun hman a ni a. Serchhip Bial PYD te chuan he ni hi intihhlimna hun atana hmangin Serchhip Sports Complex-ah nileng in hun an hmang a, bialtu Pastor Rev. Lalnghinglova chuan Hunserh hmangin General PYD President thuchah chhiarchhuah a ni bawk. UPC (Mz) Serchhip Bial-ah hian Koh-hran 5 awmin PYD Member mi 150 vel awmin kumdang ah chuan he ni hi vantlang tana thil tha tihna leh a mamawh apiangte tana thisen pekna hun atan hman thin a ni a. Kumin hian Sawrkar Pisa chawlh a nih avangin tun thla-a hun remchang ah thisen pekna hun hi nei leh tura ruahmanna siam a ni.

Kristian Thalai Pawl (KTP) Rorel Inkhawm vawi 10-na chu nimin Pathianni hmang khan Zemabawk Kohhran Biak In-ah neih a ni.