SDFA in Hmar Veng FC hremna tichhuak

Serchhip District Football Association (SDFA) chuan Serchhip District Football Championship 2023 Final Match-a buaina chungchang ah hremna a tichhuak ta.

Tarlan tawh angin thla hmasa February 13 khan Serchhip District Football Championship 2023 Final Match chu Serchhip Sports Complex-ah FC Serchhip Kawnpui leh Hmar Veng FC ten khelin he inkhel zawhfel a nih hma hian buaina chhuakin Official te kutthlak an nih avangin inkhel pawh tihtawp zui a ni a. Hemi chungchang hi SDFA chuan an ngaihtuah hnuah Hmar Veng FC lamin buaina an siam chungchangah hremna a tichhuak a. Hmar Veng FC hian an thil tih dik lohte hriaa, ngaihdam an dil hnuah SDFA/MFA buatsaih Tournament vawi khat khel thei lo tura hrem an ni a, an thil tihchhiat man hu pawisa chawi tura tih ni bawkin an thil tihchhiat te lo enchianga an chawi zat lo ruahman turin SDFA-a Treasurer leh Fin. Secretary te ruat an ni bawk.

Hei bakah hian Match Official kut thlaktu Lalchhuanmawia chu thu leh awm hma chu SDFA hriatpui Football thilah inhnamhnawih thei lo tura hrem a ni a, Hmar Veng FC Team Official Malsawmdawngliana pawh Season hnih chhung Football-a inhnamhnawih thei lo tura hrem niin Team Official bawk Zorampela chu MFA/DFA Organised Tournament vawi hnih chhung inhnamhnawih thei lo tura hrem a ni bawk a. He buaina chhuaka inhnamhnawih Player zawng zawngte chhui chian a, a tul anga action lak ngei nise ti bawkin, Disciplinary Committee-in hma an la dawn bawk a ni.

Comments

Popular News (Last 30 Days)

Vawiin-ah HSSLC Exam result