New Serchhip North khawtlang in NH. 54-a hnathawktute dangin inremna siam a ni

National Highway-54 laihzauh leh siamthat hna thawh mekah New Serchhip Kikawn Thlanmual panna kawng tihchhiat a nih avang leh hnathawktute leivung paih in Thlan thenkhat a chhilh te siamthat phutin nimin khan New Serchhip North khawtlang chuan kawngpui siam hna thawktute an dang a, inbiakna te an neih hnuah inremna siamin hnathawktute dan hi tihtawp zui a ni.
New Serchhip North Branch YMA hruaitute hnen atanga thu kan dawn danin Kikawn Thlanmual hi Kikawn (Agriculture Complex peng) atanga khawchhak lama peng niin kawng atangin Thlanmual hi meter 100 vela hla a awm a ni a, NH. 54 zauh leh siamthat hna thawh a nih dawn khan Thlanmual penna hi tihchhiat ngaiin Motor-a kal theih tura tha taka siam leh turin a thuphunga inremna neih a lo ni tawh a, hemi ang hian hna pawh an thawk tura an beisei laiin an beisei anga hna thawh a nih tak loh avang leh Thlanmual zawn-ah te pawh leivung te paih a nih tak fo avangin Serchhip DC hnenah pawh hemi chungchang hi thlenin a hmunah pawh en ho a nih thu an sawi a. Hemi chungchang ngaihtuaha Dawhkan kil-a inbiakna nei tura tih a nih laiin Company lam hotute chuan YMA hruaitute hi be pawpin, an duh anga Thlanmual kawng chu an siamsak theih tur thu an sawi tak avangin Dawhkan kila inbiakna chu an nei zui ta lo a. Amaherawh chu hei hian awmzia a neih loh avang leh Pathianni-ah pawh khan leivung te hi an lo paih leh nia a lan avangin nimin khan helai hmuna hnathawktu, KRAM Infracon Pvt. Ltd. te hnathawk tur hi khawtlang chuan an dang ta a ni.

Nimin-a hnathawktute danna ah hian New Serchhip North Branch YMA huamchhunga mi thahnem tak pungkhawmin Kikawn-ah hian Company hnathawk Motor te hi dan vek a ni a, KRAM Infracon Pvt. Ltd. atangin Chief of Project Amit Goel leh a thawhpuite rawn kalin inbiakna an nei a, Company lam hian Thlanmual panna kawng tur hi Kikawn atanga peng tura RCC hmanga siam an remtih avang leh tuna kawng la awm, leivung in a hnawh te thenfai bakah Thlanmual zawn-a leivung tawlh leh tur venna atan Gabion walls siam an remtih avangin nimin chhun atang khan hnathawk turte dan hi tihtawp zui a ni a. New Serchhip North khawtlang in kawng khu lutuk avanga harsatna an tawh sutkianna atana ni tin vawi khat tal tui hmanga kawng phuh thin an phutna pawh an tih tur thu Company hotute chuan an sawi a ni.

Hetinga inremna an neih hnu hian KRAM Infracon Pvt. Ltd. chuan lei laihna khawl chu helai hmunah hian la nghalin nimin chawhnu lam atang khan hna an thawk tan nghal a, an hna te an zawhfel theih hun tur erawh sawilawk theih ala nih loh thu an sawi a ni.