Serchhip Police ten Motor 9 atangin Kuhva rah an man
Serchhip Police atanga thu kan dawn danin heng Kuhva rah te hi Motor lian 9 hmanga rawn phurh niin Champhai District-a Khuang-leng atanga rawn phurh niin Motor khalhtute chuan an sawi a, Serchhip Police te chuan an thudawn bawhzuiin heng Kuhva rah leh a phurhna Motor te hi Keitum-ah an man a ni. Heng an Kuhva man te mi hrang hrang 5 ta nia hriat niin Lalthangpuii ta Motor 3 leh Muanpuii leh Lalrinzuala ta nia sawi Motor pahnih ve ve a phurh te an ni a, a dang pahnih erawh hi chu Motor khalhtute hian a neitu an sawi thei lo thung a, an number chauh neiin hei pawh hi a tul anga chhui zui mek a ni bawk.
Heng Kuhva te hi mi hrang hrang ta nia sawi a nih angin an dahna tur hmun pawh a in ang lo nual a, Motor 5 te hian Lunglei-a dah tur nia an insawi laiin pahnih te chuan Serchhip-a dah tur niin an sawi a, Aizawl leh Tlungvel-a dah tur nia sawi Motor pakhat ve ve a awm bawk a. Heng Motor 9 atanga Kuhva man tak te hi a vaiin bag 335 niin kg. 23,450 nia chhut a ni a, tun dinhmun ah bag khat hi Rs. 5000/- man nia chhut niin hemi anga chhut hian heng kuhva an man te hi Rs. 16,75,000/- man nia chhut a ni.
Dan lova tawlh nia hriat Kuhva te hi a phurhna Motor leh a khalhtute nen Serchhip Police te chuan manin nimin vek khan Serchhip rawn thlenpui a ni a, dan anga hmalak a nih theih nan Lunglei-a Custom Preventive Force te kutah an hlan dawn thu Serchhip Police hotute chuan an sawi bawk.
Comments
Post a Comment