Lenkawl

Chapchar Kut 2023 chu nimin khan Serchhip P&E Veng-a Leisekawt Mual-ah uar taka hman a ni a, Mizo Hnam Lam leh Zai chi hrang hrangte entir a ni.

Nimin-a Serchhip-a Chapchar Kut hmanna ah Serchhip Photographers Association (SPA) chuan ‘Chapchar Kut Miss 2023’ thlanna neiin F. Malsawmzuali d/o F. Lalhmunsiama, Ser-chhip Dinthar Veng chu Chapchar Kut Miss atan thlan a ni a. Amah hi Pachhunga University College-a Bio-Technology (VI Sem) zirlai niin Chapchar Kut-a Kut Nu, Serchhip District Bawrhsap chuan Vakiria Khim tirn Sash a bahtir bakah lawmman atan pawisafai a hlan bawk a ni.

MIZOFED Serchhip Branch-a thawktute chuan Serchhip khawpui Veng thenkhat a LPG Home Delivery kalpui mekah mipuite atanga sawiselna dawn an neih loh thu an sawi.

Serchhip-a UD&PA Department in DAY-NULM hnuaia hmalatute tana ni thum chhung awh ‘Exhibition Fair and Street Food Festival’ Serchhip Bazar-a an buatsaih chu nimin khan zawhfel a ni a, nimin chawhnu dar 1:00 khan he Exhibition leh Street Food Festival kharna hun hi Serchhip District Urban Development Officer Lalrinsanga Hnamte hovin neih a ni a, he huna Stall siam zawng zawngte hnenah Certificate hlan theuh an ni bawk. Tun tuma ‘Exhibition Fair and Street Food Festival’ a Stall siam te hi tehfung hrang hrang hmanga endik niin heng atang hian Serchhip District aiawha Mizoram pum intihsiakna a tel turte thlan leh an ni dawn a ni.

Chapchar Kut 2023 chu Vawiin hian Mizoram hmun hrang hrangah uar taka hman a ni dawn a, Serchhip-ah pawh Vawiin chawhma dar 11:00 atang hian Leisekawt Mual-ah hman a ni ang.

Serchhip Power Division-a Sr. Executive Engineer, Er. Laltlanthanga chu Selection Grade of MES (Elect) ah a kaisang a, Lunglei Power Circle-ah Superintending Engineer (SE) hna chelh tura sawn nghal niin nimin khan Serchhip a P&E Department chuan thlahna hun an hmang bawk. Serchhip Power Division-a EE hna chelh tur hi dah an la awm rih lo a ni.

Naktuk-a ‘World Hearing Day’ lo thleng tur pualin nimin khan Serchhip SP Conference Hall-ah hun hman niin Serchhip District-a Police te a thlawnin ri an hriatna enfiah sak an ni.

Mizoram State Commission for Women leh National Commission for Women, New Delhi tangkawp buatsaihin nimin khan Thenzawl Joint YMA Hall-ah Hmeichhia te tih chak leh tih hmasawnna bakah anmahni humhalhna atana Dan pawimawh hrang hrangte chungchang ah Seminar neih a ni a. He hun hi MSCW-a Member Secretary Zonunpari Sailo chuan kai-hruaiin MSCW Chairperson Lallawmchhungi chuan Women Commission hnathawh dan leh kalphung te a sawi bawk. He hunah hian mithiam te atangin thupui hrang hrang hmanga thusawi ngaihthlak niin  kalkhawmte atanga zawhna te chhan a nih bakah sawihona hun huamzau taka hman a ni bawk.

Serchhip Traffic Police te chuan Helmet (Protective Headgear) chungchangah Aizawl lamah khauh takin Dan kenkawh tan ni mah se Serchhip-ah chuan khauh taka kenkawh ala ni rih lo tih an sawi a. Amaherawh chu mipuite chu sawrkar pawmpui Helmet te chu anmahni himna atana pawimawh a nih avangin hmang ngei thei se an duh thu an sawi a. Aizawl lama hemi chungchanga Dan te kenkawh a nih hnu hian a remchan anga la kenkawh tur a nih ve dawn thu an sawi bawk.

Tun thla (March 2023) atanga hman tan turin eirawngbawlna Gas man chu IOCL in Revised Retail Selling Price a tihchhuah angin siam thar leh niin eirawngbawlna Gas man hi a sang hlek dawn a. Tuna rate thar ang hian Vairengte tihloh Mizoram hmun dang zawngah chuan kg. 14.2 a rit Domestic Cylinder man chu bur khat zelah Rs. 1255/- a ni tawh ang, kg. 19 a rit Commercial Cylinder chu Rs. 2541.50 man a ni ang. Hei bakah hian kg. 19-a rit XtraTeJ chu bur khat Rs. 2564/- a ni anga, kg. 10-a rit Composite Cylinder man pawh bur khat Rs. 899/- a ni taawh bawk ang. LPG Domestic Cylinder man ah hian Home Delivery kalpuina ah chuan bur khat-ah Rs. 70 aia tam lo zel belh tur a ni dawn a,  Go-down-a hralh erawh chuan Rs.29.26 zel paih thung tur a ni.

UD&PA Department Serchhip hnuaia Deendayal Antyodaya Yojana-National Urban Livelihoods Mission (DAY-NULM) atanga hamthatna dawng te tana buatsaih ‘Exhibition Fair & Street Food Festival’ chu nimin khan Serchhip Bazar-ah neih tan niin District Bawrhsap Nazuk Kumar IAS chuan a hawng a ni.

Nimin atang khan Mizoram pumah pawl 12 zirlai ten Higher Secondary School Leaving Certificate (HSSLC) Exam an nei tan. Kumin a HSSLC Exam-ah hian Serchhip DEO hnuaia Higher Secondary School 12-a zirlai 652 te chuan Exam Centre 9-ah Exam hi an nei a, nimin khan English Subject exam in naktuk-ah MIL (Mizo/Hindi/Nepali) an exam leh anga, tun thla ni 24 khian Exam hi an zofel dawn a ni. Hemi hmalam hian Practical Exam hrang hrang te chu neih a lo ni tawh a ni.

National Programme for Control of Blindness, Serchhip District leh Eye Care Hospital te tangkawp in East Lungdar PHC-a Cataract Operation/Free Eye Camp an neih mekah niminpiah khan Mit naute paw (Cataract) zai ngai mi 17 te Mit zai sak an ni a, nimin khan chhunzawm lehin nimin tlai thleng khan mi 12 te zai hman niin hemi hnu hian mi 11 zai leh tura ruahman a ni. Cataract Operation/Free Eye Camp neih mek hi nimin khan Serchhip District Chief Medical Officer Dr. Lalzawmi chuan a hmunah tlawhin a telpui a, Vawiin hian chhun-zawm lehin zawhfel a ni ang. East Lungdar PHC-a Cataract Operation neih mekah hian a hma lama khaw hrang hrang atanga Mit naute paw zai ngai hmuhchhuah tawh te pawh zai an ni.

Serchhip DC Office-a Superintendent hna chelh mektu R. Lalmuankimi chu Senior Grade-ah kaisangin Directorate of Women & Child Development-ah Deputy Director (Admn) hna chelh tura sawn a ni a, Tourism Department-a Superintendent hna chelh mektu R. Lalhma-ngaihi chu Serchhip DC Office-a Superintendent hna chelh tura ruat a ni bawk.

Nimin atang khan District Blindness Control Society leh Eye Care Hospital, Aizawl te tangkawp buatsaihin East Lungdar PHC-ah Cataract Operation/Free Eye Camp neih a ni a, nimin tlai dar 3:00 thleng khan mi 100 vel zet an Mit enfiah sak an ni. He hunah hian Serchhip, Ngentiang, Khawlailung, N. Vanlaiphai leh E. Lungdar bial-a Mit naute paw (Cataract) zai ngai hmuhchhuah tawh sa te pawh zai nghal an ni dawn a, nimin khan mi 16 zai hman niin Vawiin leh naktuk-ah chhunzawm leh a ni ang. He hun hmang tur hian Aizawl atangin National Programme for Control of Blindness (NPCB) State Programe Officer Dr. Lalbiaksiami hovin mi 10 zet an kal bawk a ni.

Nimin atang khan pawl 10 zirlai ten High School Leaving Certificate (HSLC) Exam nei tanin Vawiin hian pawl 12 zirlai ten Higher Secondary Sdchool Leaving Certificate (HSSLC) Exam an nei tan bawk ang.

Serchhip Town Development Committee (STDC) chu nimin khan thukhawmin Serchhip khawpui chhunga hmalakna tur hrang hrangte an ngaihtuah.

Serchhip-a awm 23 Sector Assam Rifles hnuaia 42 Bn. te chuan nimin atang khan ni 15 chhung awh tur ‘Brain Break Extra Co-Curricular Activities Camp’ chu Serchhip-a Assam Rifles Public School-ah an nei tan a, he hun hi zirlai ten School-a an thil zir piah lamah anmahni tana tangkai thil chi hrang hrang an zir theihna atana ruahman niin Art & Craft, Karate & Yoga, Music & Instrument, Vocational Training hrang hrang neihpui an ni dawn a, a ni khatna, nimin khan naupaang 60 zet an inziaklut a ni.

College of Horticulture, CAU Thenzawl-a B.Sc (Horti) Final year zirlai titha thlanchhuah mi pahnih, Nyari Taku (Arunachal Pradesh) leh Lijanbeni Ovung (Nagaland) te chu thla khat chhung awh tur Thailand-a Queen Sirikit Botanic Garden, Chiang Mai-a Workshop on 'Entrepreneurship opportunities in Agriculture and related aspects' (under IDP, NAHEP) neih turah kal tura thlan an ni a, nimin khan Horticulture College, Thenzawl Vengthar atangin Dean Dr. Shri Dhar chuan a vailiam a ni.

Govt. Serchhip College-a Principal mawh-phurhna la mektu K. Laldinpuii chu Pension in a chhuak ve dawn ta a, Vawiin hian a thawhpui ten a thlahna hun an hmang ang. Govt. Serchhip College Principal mawhphurhna la tur hian H. Zonuntluanga, Associate Professor (Political Science) chu ruat niin Vawiin hian mawhphurhna an inhlan nghal dawn a ni.