Serchhip Mat Phai-a hmun zau zawkah Kawlphetha pe turin hmalakna kalpui mek a ni

Serchhip Mat Phai Zawlpui zau leh a chhehvel-ah kawlphetha pe turin ngawrh taka hmalak mek a ni a, harsatna dang a awm a nih loh chuan kumin-a Leilet neitu ten an Leilet-a hna bul an tan hmain kawlphetha hi pek hman an beisei thu helai hmuna hnathawktute chuan an sawi.

Serchhip-a Power & Electricity Department hotute hnen atanga thu kan dawn danin Serchhip Mat phai-a kuthnathawktuten Agriculture lama hmasawnna an neih zel theihna turin hun engemaw chen kalta ah khan Chuanhnuai atangin Zawlpui-a Agriculture Department Thlam thleng kawlphetha thlun hna hi thawh a lo ni tawh a, hei hi mamawhna a san belh zel avangin tunah hian NABARD atanga sum hmuh hmangin thawh chhunzawm leh mek a ni a, a thawh khatna atan cheng nuai 180 sengin tunah hian hmalak mek a ni a, High Tension (HT) Line thlun hna thawh mek niin hemi hmang hian 11kV in kawlphetha hi pawhluh a ni dawn a, heng te hi Transformer-ah lutin heta tang hian mipuite hman theih turin Low Tension (LT) Line-ah pekchhuah a ni leh dawn a, kuthnathawktuten kawlphetha an dawn theihna tur hian hmun hrang hrangah 25kVA Transformer 11 dah a ni dawn tih P&E Department atanga thudawnna chuan a tarlang bawk.

Helai hmuna hnathawktute chuan tun dinhmunah Zawlpui Zau-ah hna an thawh tawh thu leh nimin lam khan Tuichar lui leh Lumtui lui inkar-ah 11kV Line tur an phun mek thu an sawi a, tuna an Line thlun mekah hian Transformer 4/5 vel dah tura ruahman a nih thu leh ban an phun zawh chuan a Electric hrui pawh thlun nghal tur a nih dawn thu an sawi a. He hmalakna hnuaiah hian a Thawh 2-na pawh ruahmanna a awm thu leh a thawh hnihna ah hian Chawm kai, Vaivenga Zau leh Kai hnihna ah te la thlun leh tura ruahman a nih thu an sawi bawk.

P&E Department-a thawktute chuan helai hmuna hnathawh mek hi thawktu mi 10 rual ten an riahchilh mek thu leh hriat lawk loh harsatna a awm a nih loh chuan kumin-a Leilet neitu ten Leilet-a hna an tan hmain Eng pek theih an inbeisei thu an sawi a. Helai vela Zau hruaitute leh Leilet neituten an tawiawmna ah lawmthu sawiin, hna thawk lai mek an nih avangin an bungrua te dahfel vek theih a nih loh thu leh a tichhetu ni lova a venhim saktu ni tura mipuite ngenin, Serchhip tana Mellung pawimawh tak a nih avangin a theih anga hnathawktute lo tawiawm zel tura an ngen thu an sawi bawk a ni.