Serchhip District-ah SDO (Sadar) hovin International Women’s Day 2023 hman a ni

Women & Child Development, Serchhip District huaihawtin niminpiah-a ‘International Women's Day 2023’ pualin nimin khan Serchhip-ah hun hman a ni a, he hun hi Serchhip SDO (Sadar) Lalzikpuii chuan khuallian nia hmanpuiin, “Kan tu leh fa te kawng dik kawhhmuh leh zirtir hi kan tih tur a ni a, an entawn tlaka kan awm a tul a ni,” a ti.

Serchhip P&E Veng-a AH&Vety Department Training Hall-a International Women's Day puala inkhawm khuallian nia hmanpuitu Serchhip SDO (Sadar) Lalzikpuii chuan International Women's Day chu Mizoram leh India ram mai ni lo, khawvel puma ni pawimawh a nih thu sawiin, hei ni hi Hmeichhia te hlutna kan hriatna leh an hlawhtlinna kan tarlanna ni pawimawh a nih thu a sawi a. Mizoram-ah Hmeichhia ten nasa taka hma an sawn mek thu sawiin, sawrkar hna ah te, infiamna ah leh Politics ah pawh dinhmun sang tak tak luah mi tam tak an awm thu leh an dinhmun ang nei phak lo hi khawvel ram dang tam takah an awm thu a sawi a, hetiang dinhmun tha an neih hi kan Kristianna vang a nih pakhat thu sawiin, hei vang hian kan ram-a chanchin tha rawn thlentute pawh an pawimawhna leh an hlutna kan hriat reng a pawimawh thu a sawi bawk.


SDO (Sadar) chuan nu leh Hmeichhia te pawimawhna sawiin, kan ram dinhmun a tha lo tam tak siamthatna kawngah mawhphurhna sang tak an nei tih an hriat a tul thu a sawi a, kan ram-a harsatna te hi vawi leh khata umbo vek theih ni lo mah se naupangte atanga bultanin hma kan sawn zel thei a ni tih kan hriat a tul thu a sawi a. Chumi atan chuan chhungkua chu a bulthut a nih thu leh chhungkua ah pawh nu te chu a pawimawh ber an nih thu sawiin, “Kan tu leh fa te kawng dik kawhhmuh leh zirtir hi kan tih tur a ni a, chumi bakah chuan an entawn taka kan awm a tul a ni,” a ti a, “Kan ram siamtha turin Minister leh Officer emaw nih kher a ngai lova, keimahni zawn ah theuh tih tur kan nei,” a ti a. Hei bakah hian Hmeichhia leh Hmeichhia te chu an harsatna in hriatpui bertu an nih avangin kawng hrang hrangah an in thlawpa an thawhho a pawimawh thu a sawi bawk.

Khual zahawm nia he hun hmanpuitu Women and Child Development Department-a Deputy Director (A) R. Lalmuankimi pawhin International Women's Day chu Hmeichhia te tan ni ropui bik a nih thu sawiin, ram thenkhat leh Hnam thenkhat ah Hmeichhia te endawngna leh rahbehna awm thin mah se Mizo Society ah erawh hetiang hi a awm loh thu leh zirna leh thildang dang ah pawh Hmeichhia te chu a tum ruh, tuarchhel leh hlawhtlinna chang te an nih thin thu a sawi a. Pathian in mihring a siam danah Hmeichhia chu a awmnem zawk ni mah se rilru leh taksa a rim taka hna an thawhna chu chhung-kua leh khawtlang in a hlawkna a tel thu a sawi a. Chutihrual chuan Bible in Mipa leh Hmeichhia dinhmun a sawi erawh hriat reng a tul thu a sawi a. “Mipa te pawhin Hmeichhia an zah thiama tha taka an enkawl hian chhungkaw hlim leh khawtlang nuam kan nei thei a ni,” a ti bawk.


Kumin-a International Women's Day ah hian thupui atan ‘DigitALL: innovation and technology for gender equality- Hmasawnna thil thar leh khawl hmanga thiamna te hmeichhia leh mipa intluktlanna atan’ tih chu hman a ni a, he thupui hmang hian Resource Person mi 3- K. Laldinpuii (Ex-Principal, Govt. Serchhip College), Caryll Lalpari (CDPO Serchhip ICDS Project) leh C. Lalruatsangi (BMM, MzSRLM Serchhip) ten an sawi a ni.

Nimin-a he hun hmanna ah hian F. Hmingthankimi, DMC (DHEW) Serchhip District chuan inlawmna thu a sawi a, Mizoram Open Boxing Championship 2023-a Gold Medal latu K. Zorempuii, Serchhip Vengchung pawhin thu sawiin, International Women's Day pual hian chawimawina hlan nghal a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar